Tơ̆ pơlei Alê A, phương Ea Kao, dêh char Đăk Lăk, lơ kon pơlei akŏm ah Hnam joh ayŏ tơpôl, tơrĕk hơlen lăng Hop akŏm lơ̆m tivi. Ƀok Y-Kanin tơroi: "Rim bơngai tơ̆ ou tơguăt tơguăl, đei lơ 'nhŏng oh hăm hơdrung bơngai phara băl, nhôn tôch chơt hơ-iă păng hơpơi 'meh gô đei lơ tơdrong tơplih lơ̆m khei năr truh. Đe Kơdră jĭ dôm bơngai hlôh vao kloh klĕch, 'noh inh lui, Hop akŏm gô đei jơnei 'lơ̆ng rŏ. Hơpơi 'meh Hop akŏm gô đei lơ trong tơchơ̆t 'lơ̆ng gah choh jang xa, asong jên jang, joha yŏ vă hơtŏk mŭk drăm "

Tơ̆ pơlei Stơr, xah Tơ Tung, dêh char Gia Lai, 'nhŏng Đinh Bơn tơroi: “Pơlei nhôn noh tơring hơtaih yaih. Hơpơi 'meh kiơ̆ đơ̆ng Hop akŏm Đảng ou, Teh đak, jơnŭm pơgơ̆r tơring tơgŭm lơ hloh đơ̆ng ăn kon pơlei pơla. Kon pơlei nhôn hơpơi 'meh Hop akŏm Đảng đei jơnei keh kong, đei lơ trong pơkăp jang trŏ ƀlep vă hơtŏk tơ-iung teh đak”

Hăm đon lui kơjăp hăm Đảng, ƀok Lâm Tấn Bình, minh 'nu bơngai hŏk kơjung kơ kon pơlei Chăm tơ̆ xah Bắc Bình, dêh char Lâm Đồng hơpơi 'meh, Hop akŏm mă 14 kơ Đảng gô tơlĕch tơchơ̆t lơ trong jang trŏ ƀlep, kăp gĭt, pơtrŏ hăm tơdrong tơchơ̆t hơtŏk tơ-iung kơ teh đak lơ̆m chăl jang 'nao dang ei: "Kon pơlei kon kông pơma atŭm păng lơ̆m noh đei kon pơlei Chăm hơpơi 'meh đei dôm tơchơ̆t trŏ ƀlep đơ̆ng Đảng, vă tơgŭm ăn teh đak Việt Nam adoi nhen ăn kon pơlei kon kông, pơtoi gơh jang vă hơtŏk mŭk drăm, vei răk joh ayŏ kon kông kơdih. Vă gơh đei thoi noh, tôm kon pơlei athei pơtoi pơm kiơ̆ tơchơ̆t tơguăt tơguăl hăm dih băl, vă atŭm jơhngơ̆m hăm teh đak hơtŏk tơ-iung lơ̆m chăl anglŏ sơnăm tơlĕch jang 'nao"