Hop akŏm mă XIV kơ Đảng đei hơnăn: Hơla Hla kơ gơh kơ gei kơ Đảng, pôi akŏm jơhngâm, mât 1 ƀơ̆r đon bơ̆ jang đei jơnei dôm tơdrong jang tŏk teh đak truh sơnăm 2030; hơmet kơ dih trong jang, jang tŏk kơdih, hơđơ̆ng jơhngâm, yak tŏk pran lơ̆m chăl jang tŏk đơ̆ng hơdrĕch hơdrung yoa tơdrong rơngei, pơgơ̆r kơdih, kon pơlei pơm tơm, pơdrŏng pran kơtang, hơnŭk hơnoa, gơ̆h hơgei, hiôk chơt, yak tŏk pran kiơ̆ trong chủ nghĩa xã hội.

Hop akŏm mă XIV kơ Đảng hlôi jang kĕh rim tơdrong đei tơlĕch, hăm tơdrong hơlen năng dôm tơdrong jang kiơ̆ Tơdrong tơchơ̆t đơ̆ng Hop akŏm mă XIII tơklep hăm pơtôch 40 sơnăm Tơplih ‘nao, tơƀôh hơdăh dôm tơdrong jơnei gĭt kăl, ‘lơ̆ng hơiă, roi tơbăt dôm tơdrong tam mă pran ‘lơ̆ng păng kơlih yoa kiơ, chih iŏk dôm ƀai hŏk tih, gĭt kăl tơ̆ yăn âu ăn tơdrong jang pơjing, atŏk tơiung teh đak; pơma nuh păng drơ̆ng nơ̆r hăm trong vă jang, đon pơhnŏng bơ̆ jang, tơdrong jang tơm vă jang tŏk đơ̆ng 2026 - 2030, trong vă jang truh sơnăm 2045; hơlen năng mă nhen rim tơdrong jang tơiung pơjing Đảng, anih jang chinh trĭ rơgŏh ‘lơ̆ng, pran kơjăp; pôk rơih Khul kơdră chĕp kơ̆lTrung ương Đảng jăl XIV.

Hăm jơhngâm đon tơplih ‘nao, jang tơnăp ‘lơ̆ng tơ̆ hơnăp teh đak păng hơdrĕch hơdrung, Hop akŏm chă rơih păng pôk hơtŏk bơngai jang lơ̆m Khul kơdră chĕp kơ̆l Trung ương Đảng jăl XIV đei 200 ‘nu, lơ̆m noh đei 180 ‘nu jang tơpă păng 20 ‘nu bơngai jang pơgia.

Pơgê 23/1, Khul kơdră chĕp kơ̆l Trung ương Đảng jăl XIV pơgơ̆r hop akŏm hop akŏm mă mônh, pôk rơih bơngai jang lơ̆m Anih tơm Chinh trĭ, Tổng Bí thư, Ban Bí thư, Anih dăr hơlen kơ Trung ương Đảng, Kơdră Anih dăr hơlen kơ Trung ương Đảng jăl XIV.

Hop akŏm bơngai tang măt lơ̆m teh đak ‘măng mă XIV kơ Đảng đei pơgơ̆r đang ‘lơ̆ng tơƀôh hơdăh tơdrong juăt mât mĭnh ƀơ̆r đon đơ̆ng Đảng, tơƀôh hơdăh ăn đon lui păng tơdrong hơpơi ‘mĕh yoa mĭnh teh đak Việt Nam rơngei hiôk hian, pơgơ̆r kơdih, kon pơlei pơm tơm, pơdrŏng pran kơtang, hơnŭk hơnoa, gơ̆h hơgei, hiôk chơt; yak tŏk pran lơ̆m chăl ‘nao, chăl pơdrŏng đei ƀôh hăm tơdrong chĕp kơ̆l pơgơ̆r đơ̆ng Đảng, pơjing đei teh đak Việt Nam xã hội chủ nghĩa.