Lơ̆m jăl trong tơmang pơhiơ̆ đak dơsĭ Phan Thiết – Mũi Né – Bàu Trắng – Cổ Thạch, kơthôt Pô Sah Inư tơ̆ groi Bà Nài (phương Phú Thủy, dêh char Lâm Đồng - găh dêh char Bình Thuận so) tok bŏk hơvơn đei lơ tơmoi năm tơmang pơhiơ̆ lơ̆m khei pơdơ̆h hŏk pơhrăm. Jô̆ hơtŏ lơ̆m mĭnh năr sơng hơvơn đơ̆ng 900–1.200 ‘nu tơmoi lơ̆m teh đak păng teh đak đe. Đơ̆ng blŭng sơnăm truh dang ei, hlôi đei vă jê̆ 75.000 ‘nu tơmoi truh tơmang lăng kơthôt Pô Sah Inư, dêh char Lâm Đồng. Vă pơm hơtŏk hơnih tơmang pơhiơ̆, Khul chĕp pơgơ̆r hơnih gru gra gĭt kăl dăr sơnăm iung jang hơdoi hăm Khul jŏh ayŏ kơdŏ soang hơdrung Chăm chă joh hơri ăn tơmoi lăng. Tơdrong đei cham char să ‘lơ̆ng, hnam sơ̆ ki ‘lơ̆ng liĕm păng tơdrong joh ayŏ kơdŏ soang ‘lơ̆ng rŏ pơjing đei tơdrong hơ iă hloh. Hơdrô̆ lơ̆m khei 6, tơring Bình Thuận so sơng đei hloh 1 triu ‘nu tơmoi. Akŏp lơ̆m 6 khei blŭng sơnăm 2025, tơring ou sơng đei hloh 5 triu 500.000 ‘nu tơmoi, tŏk vă jê̆ 20% pơtêng hăm khei năr ou lơ̆m sơnăm sơ̆; iŏk đei đơ̆ng jang tơmang pơhiơ̆ hloh 15.000 ti hlak jên.