Đơ̆ng rŏng vă jê̆ 7 khei sơnăm 2025, tơlĕch jên tơmơ̆t jang teh đak kơ dêh char Lâm Đồng lăp đei hloh 27%. Sơnăm 2025 akŏm jên tơmơ̆t jang teh đak, ‘noh pơđĭ sơnăm 2024 tăh ăn kơ dêh char Lâm Đồng ‘noh hloh 18.900 ti hlak jên. Jô̆ truh vă jê̆ tŏk bŏk khei 7, dêh char ‘nao tơlĕch jên jang đei hloh 4.380 ti hlak jên, iŏk đei kơsô̆ hloh 27%.

Kiơ̆ kơ Anih vei lăng kon pơlei dêh char Lâm Đồng, tơdrong tơm pơm ăn yua đơ̆ng dôm tơdrong jang iŏk yua jên tơmơ̆t jang teh đak tơ̆ pơđĭ 3 tơring, ‘noh dêh char Đăk Nông, Bình Thuận păng Lâm Đồng so tă kơ tơhlăk iŏk pơ ‘ngoăih teh, mă loi ‘noh jĭ dôm tơdrong jang tơm trong nơnăm iŏk lơ jên tơmơ̆t jang. Ƀok Hồ Văn Mười, Kơdră Anih vei lăng kon pơlei dêh char Lâm Đồng, roi tơbăt, dêh char Lâm Đồng tŏk bŏk hơdrin tơlĕch jang kiơ̆ lơ trong jang vă tŭn hrĕnh tơlĕch jên tơmơ̆t jang teh đak, lơ̆m noh tơm ‘noh jĭ tơdrong iŏk pơ ‘ngoăih teh.