Tơdrong asong bơngai jang ưh hơdrô̆ kiơ̆ kơ ƀăng hŏk pơhrăm, sơnăm pơm jang mă oei tơrĕk tơdrong gơh jang, tơdrong tơnăp păng jang 'lơ̆ng. Lơ kang ƀô̆ sơnăm mơlôh, hŏk kơjung, đei đon tơchĕng 'nao, pơ̆n tơchĕng pơ̆n pơm jang hlôi đei pơjao sơnong jang kăp gĭt. Ƀok Hồ Văn Mười, Kơdră Hơnih jang vei lăng kon pơlei dêh char Lâm Đồng ăn tơbăt, ah đei asong trŏ tơdrong jang, kang ƀô̆ iŏk jang tơnăp tenh kuăng hloh, ưh đei tơdrong chă hơlơ̆k hơle ou to, hơtŏk đon lui ăn kon pơlei hăm jơnŭm pơgơ̆r tơring.

Tơpă ăn ƀôh tơdrong asong kang ƀô̆ “trŏ sơnong jang, trŏ tơdrong kăl” kơ dêh char Lâm Đồng ưh hơdrô̆ tơdrong kăl tơ̆ hơnăp mă oei jing trong pơm jang đunh đai, tơƀôh tơdrong jang chĭnh trĭ kăp gĭt kơ dêh char lơ̆m tơdrong pơjing khul kang ƀô̆ dơnơm đei đon bơnôh 'lơ̆ng, gơh hơgei păng tơnăp, pơtrŏ hăm tơdrong kăl tơlĕch jang lơ̆m chăl 'nao, tơgop hơtŏk mŭk drăm – tơpôl tơ̆ tơring kơjăp sơđơ̆ng hloh.