Đơ̆ng rŏng mĭnh khei tơlĕch jang “ ‘Măng iung jang Quang Trung” tĕnh koăng tơ iung pơjing dơ̆ng, ming hơmet hnam oei ăn ŭnh hnam răm kơ yuơ ‘mi kial hơbŭt hơbông pơrăm, truh năr 29/ 12/ 2025 dêh char Lâm Đồng hlôi man ‘nao keh đang 9 pơbŭng hnam. Găh 29 pơbŭng hnam kăl vă ming man ‘nao, dang ei khul ƀô̆ đô̆i, kŏng ang, kơdră tơring păng rim hơnih bơ̆ jang tơring tŏk bŏk hơdrin tơgŭm kon pơlei keh đang hrôih. Truh năr 31/12/ 2025 gô đei dơ̆ng 4 pơbŭng hnam keh đang păng 25 pơbŭng hnam uơ oei dêh char Lâm Đồng tŏk bŏk ming man tĕnh koăng vă keh đang hơdrol năr 15/1/2026. Vă rim pơbŭng hnam ‘nao ming man păng ming hơmet ăn kon pơlei đơ̆ng rŏng ‘mi kial pơrăm kơjăp ‘lơ̆ng, dêh char Lâm Đồng hơvơn rim khul tơgum djru kon pơlei jang păng mĭnh ƀar tơmam drăm ming man kăl.

Truh dang ei, dêh char Gia Lai hlôi man đang 456/674 tŏ hnam, iŏk đei 67,66%. Mă hơdăh, jô̆ truh ‘năr 28/12, dêh char Gia Lai hlôi pơm hơmet ming 27.501/27.522 tŏ hnam hư, iŏk đei 99,92%. Dang ei oei pă 21 tŏ hnam kăl đei pơm hơmet ming, oei tŏk bŏk jang vă đang bơih, tơchĕng adrol gô jang đang adrol kơ ‘năr 31/12/2025.

Hăm tơdrong man ‘nao, dêh char Gia Lai hlôi tơlĕch man đĭ đăng 674 tŏ hnam păk, hư pơchăh. Truh dang ei, 456 tŏ hnam hlôi đei man đang; 218 tŏ hnam oei đei dơ̆ng oei hăt man pơkeh. Dêh char tơlĕch đon pơhnŏng vă pơjao hnam ăn kon pơlei adrol kơ ‘năr 25/1/2026. Kŭm hăm tơdrong mong akŏm jên, tơmam, dêh char hlôi tơlĕch hlŏh 720 ti jên đơ̆ng teh đak păng jên mong đơ̆ng tơpôl vă tơgŭm ăn tơdrong arih xa tơpôl, hơmet pơ ‘lơ̆ng hiong răm păng pơjing dơ̆ng dôm tơring oei xa ‘nao.