Tơ̆ dêh char Lâm Đồng, 3 tơdrong ming man trong kơdou hrĕnh dơnơm kơ teh đak tŏk bŏk oei đei ming man tenh kuăng. Tơdrong man trong kơdou hrĕnh Tân Phú – Bảo Lộc, kiơ̆ pơkăp jang hơdoi tơ-'ngla păng teh đak, đei trong hơtaih 66km, lơ̆m noh jăl găn dêh char Lâm Đồng hơtaih 55km, pơtơm man ah năr 19/ 12/ 2025. Tơdrong iŏk teh ming man đei pơtơm hrŭ 'mong đơ̆ng khei 10 sơnăm 2025.

Truh dang ei, tơring hlôi kĭ pơkăp hrŭ ăn 590 lơ̆m 898 unh hnam kon pơlei ƀơm iŏk teh. Hăm jăl trong kơdou hrĕnh Tu – Pơbah gah Pơmơ̆t, jăl Gia Nghĩa – Chơn Thành hơtaih jê̆ 129km, lơ̆m noh jăl găn dêh char Lâm Đồng hơtaih hloh 23km hlôi đei 135 lơ̆m 152 unh hnam đei kĭ pơkăp hrŭ 'mong, kơchĕng gô keh đang lơ̆m khei 1/ 2026. Hăm jăl trong kơdou hrĕnh Bảo Lộc – Liên Khương, hơtaih 74km, hlôi đei 2.347 hô sơ lơ̆m 2.464 hô sơ đei kĭ pơkăp kla jên hrŭ 'mong.