Atŭm hăm tơdrong pơjing Hơnih bơ̆ jang vei lăng pôk rơ̆ih kơdră tang măt Kuôk hô̆i jăl XVI păng kơdră tang măt Jơnŭm vei lăng kon pơlei rim tơring jăl XI, đĭ đăng tơring, phương, tơring kăl lơ̆m dêh char hlôi pơjing Hơnih bơ̆ jang vei lăng pôk rơih păng tơ iung pơjing trong jang pơgơ̆r pôk rơ̆ih ƀlep trong tơlĕch ăn. Hơnih bơ jang MTTQ Việt Nam dêh char hlôi pơgơ̆r Hop akŏm pơma dơnuh ‘măng mă blŭng, drơ̆ng mĭnh nơ̆r găh măt bơngai chih anăn ăn pôk tơmơ̆t. Kiơ̆ klăh asong, Lâm Đồng đei 17 ‘nu kơdră tang măt Kuô̆k hô̆i; tơƀôh tơbăt ăn 153 ‘nu bơngai chih hơnăn ăn pôk tơmơ̆t jang lơ̆m Jơnŭm vei lăng kon pơlei dêh char vă pôk rơ̆ih iŏk đei 85 ‘nu bơngai tang măt. Tơ̆ tơring, Khul kơdră chĕp pơgơ̆r Hơnih bơ̆ jang MTTQ Việt Nam rim tơring hlôi jang keh đang hop akom pơma dơnuh ‘măng mă blŭng. Hăm tơdrong hơmet ăn tôch kơ brĕ, ‘lơ̆ng hơ iă păng hrơ̆p mĭnh ‘măng, dêh char Lâm Đồng roi năr roi sơđơ̆ng ăn ‘măng pôk rơ̆ih tơpă jing năr lêh tih kơ pơ đĭ kon pơlei, jang kiơ̆ ‘lơ̆ng tơdrong pơm tơm kơdih păng jơhngơ̆m pran tơgoăt tơgoăl pôm nơ̆r ƀơ̆r đon lơ̆m Kon pơlei.