Tơdrong jang tơmơ̆t jên jang ming man trong gre kơdâu hrĕnh Bảo Lộc - Liên Khương năm klĕch 10 xăh, phường kơ dêh char Lâm Đồng, ƀơm ưh kơ ‘lơ̆ng truh hloh 5.400 ŭnh hnam kon pơlei păng 14 anih jang, hăm akŏm hơgăt teh kăl kơ iŏk pơdreo vă jê̆ 600hek tar, lơ̆m ‘noh đei teh oei, teh choh jang sa, teh bri, teh khŭl lĭnh.

Đei tơlĕch jang lơ̆m ‘năr 29/6, ƀơ̆t lơ̆m jăl jang tơmơ̆t ăn bơ̆jang khŭl kơdră chĕp kơ̆l tơring 2 tăl păng bơ̆jang kiơ̆ tơmơ̆t hơdai dêh char, tơdrong jang tơjră hăm lơ pơma tat, tơhlăk tơhlĭn. Tơ̆ xăh Ninh Gia, tơring đei hloh 100 ŭnh hnam đei ƀơm ưh kơ ‘lơ̆ng yua đơ̆ng tơdrong jang, ƀok Võ Hữu Xuân, Kơdră Anih vei lăng kon pơlei xăh roi tơbăt, pơmat tat blŭng a mă xăh tơvŏk ƀơm ‘noh jĭ ưh kơ măh kang ƀô̆ joăt jang vă bơ̆jang kiơ̆ tơdrong jang hrŭ ‘mong, iŏk pơ ‘ngoăih teh:

“Hơmet ming găh bơngai joăt jang kơ Anih vei lăng Mŭk drăm hơmet ming ưh kơ hơtŏ ‘nhŏng oh ‘nao gơh iŏk tơdrong jang. Lơ̆m kơplăh jang tơgŭm tơlĕch jang hơnăp jang chĕng hơmet teh kŭm nhen kơjă teh đei pơmat tat. Dang ei tơhlăk chĕng hơmet teh atŭm đơ̆ng rim xăh kơna tam mă tơlĕch jang đei tơdrong jang đơ̆ng rŏng dơ̆ng vă pơjing tơdrong jang hơnih oei hle”.

Kiơ̆ kơ ƀok Nguyễn Thanh Chương, tang măt Anih vei lăng tơdrong jang tơmơ̆t jên jang ming man dêh char Lâm Đồng, đơ̆ng rŏng hloh 1 khei tơdrong jang đei tơlĕch jang, kŭm jing hloh 1 khei tơmơ̆t bơ̆jang khŭl kơdră chĕp kơ̆l tơring 2 tăl, 1,2 tơdrong hơgăt ƀơm truh tơdrong jang iŏk pơ ‘ngoăih teh oei tam mă đei chih tơmơ̆t; teh hơnih bơ̆jang tơ̆ hơnih tơdrong jang năm klĕch đei tơplil tơdrong hơlen lăng  kơjă teh hơdăh, pơjing trong jang hrŭ ‘mong, dôm hơnih oei hle...tă kơ hiơ̆ ngăl. Ƀok Nguyễn Thanh Chương roi tơbăt, kŭm hăm hơmet pơ ‘lơ̆ng tơhlăk tơhlĭn dôm tơdrong găh hơnăp jang đơ̆ng tơring, dêh char Lâm kŭm tŏk bŏk apĭnh Trung ương tơgŭm hơdrol pơvei tơdrong jang tơgŭm hơdrô̆ găh hơnih sir iŏk tơmam drăm kăl lơ̆m teh vă vei sơđơ̆ng hrĕnh ming man trong gre kơdâu hrĕnh Bảo Lộc - Liên Khương:

“Tơ̆ trong Bảo Lộc - Liên Khương hlôi chĕng hơmet teh 11 hơnih sir iŏk tơmam drăm kăl lơ̆m teh, lơ̆m noh đei 4 hơnih teh chưk klơ̆p, hơnih sir iŏh chuơh păng 6 hơnih sir iŏk teh vă tơlĕch jang ăn tơdrong jang. 11 hơnih âu hlôi tơmơ̆t lơ̆m Tơdrong tơchơ̆t 106 đơ̆ng Quốc hội găh pơlong lăng tơdrong jang tơgŭm hơdrô̆ ăn dôm tơdrong jang. Tơdrong tơchơ̆t 106 đei tơmơ̆t yua truh ‘năr 30/6, Anih vei lăng kon pơlei dêh char Lâm Đồng đei apĭnh hăm Khŭl kơdră teh đak păng Quốc hội ăn phep hơnơ̆ng pơdui đunh Tơdrong tơchơ̆t 106 gô hrĕnh hloh bơ̆jang kiơ̆ Luơ̆t tơmam drăm lơ̆m teh.”

Kiơ̆ trong tơlĕch jang đơ̆ng dêh char Lâm Đồng, khei ‘năr iŏk bơ̆jang ming man trong gre kơdâu hrĕnh Bảo Lộc-Liên Khương ‘noh 30 khei. Vă vei sơđơ̆ng tơdrong jang tơlĕch ăn, kơdră chĕp kơ̆l Anih vei lăng kon pơlei dêh char Lâm Đồng hơnơ̆ng năm hơlen lăng, athei hơmet pơ ‘lơ̆ng tơdrong tơhlăk ăn tơdrong jang. Hơdai hăm ‘noh ăn kang ƀô̆ joăt jang tơ̆ dêh char năm tơgŭm tơ̆ xăh; tơtĕnh pơjing Anih vei lăng Tơdrong jang pơm trong nơnăm dêh char; Hơnih Hơtŏk tơiung teh dêh char; Anih vei lăng tơdrong jang Choh jang sa dêh char.... vă bơ̆jang kiơ̆ dôm tơdrong joăt jang. Ƀok Hồ Văn Mười, Phŏ Bí thư Đảng dêh char, Kơdră Anih vei lăng kon pơlei dêh char Lâm Đồng, ăn tơbăt, hăm dôm tơdrong jang tơm kơ dêh char, lơ̆m noh đei tơdrong jang pơm trong gre kơdâu hrĕnh Bảo Lộc - Liên Khương, iŏk pơ ‘ngoăih teh đei băt hơdăh ‘noh jĭ trong jang kăl tơm:

“Nhôn ling lang bơngơ̆t kơ tơdrong ‘nâu. Trong jang ‘noh jĭ roi tơbăt, krao hơvơn vă kơ kon pơlei hlôh băt đei dôm tơdrong jang tơm, dôm jăl trong gre kơdâu hrĕnh âu gô hơnhăk ăn đei yua kiơ ăn kơ kon pơlei mưh hrŭ ‘mong, iŏk pơ ‘ngoăih teh athei trŏ tơdrong, trŏ lăp. Nhôn hlôi apĭnh kơdră Anih jang Đảng dêh char ăn pơjing Khŭl pơgơ̆r jang hơmet pơ ‘lơ̆ng dôm tơdrong tơm, lơ̆m noh đei pơjing Khŭl pơgơ̆r jang iŏk pơ ‘ngoăih teh păng athei Bí thư Đảng dêh char gô jing bơngai pơm Kơdră khŭl jang âu păng gô athei dôm bơngai jang lơ̆m Khŭl chĕp kơ̆l Anih jang Đảng dêh char, dôm bơngai jang lơ̆m Anih jang Đảng dêh char kiơ̆ lơ̆m jơhngơ̆m đon ‘noh rim bơngai jang athei pŭ hơnăp jang răp hơlen, dăr lăng akŏm pơgơ̆r tơdrong jang iŏk pơ ‘ngoăih teh”.

Hơmet pơ ‘lơ̆ng pơmat tat, tơhlăk tơhlĭn lơ̆m jăl jang pơtăl dơ̆ng, bơ̆jang khŭl kơdră chĕp kơ̆l tơring 2 tăl, dêh char Lâm Đồng tŏk bŏk akŏm hơmet pơ ‘lơ̆ng tơhlăk tơhlĭn ăn rim tơdrong jang tơm vă pơtrŭt mŭk drăm - tơpôl hơtŏk tơiung. Hơdrô̆ hăm Tơdrong jang tơmơ̆t jên jang pơm trong gre kơdâu hrĕnh Bảo Lộc - Liên Khương, rim anih jang kơpal kơ dêh char păng 10 xã, phường hơnih trong gre kơdâu hrĕnh năm klĕch tŏk bŏk akŏm tôch ai ăn tơdrong jang iŏk pơ ‘ngoăih teh. Tang măt Anih tơmơ̆t jên jang pơm trong gre kơdâu hrĕnh Bảo Lộc - Liên Khương roi tơbăt, truh khei 10 kơnh gô jang đang tơdrong jang hrip plĕh ƀôm mĭn. Tơdrong jang dăr hơlen chhơ̆ pơm, rơih iŏk hơnih iŏk jang gô jang đang lơ̆m khei 11 păng pơtơm tơlĕch jang ming man trong gre kơdâu hơgăt teh.