Hop akŏm pơma hơdăh, khei ‘năr âu ki Đảng păng teh đak ưh kơ đei pơdơh bơngơ̆t truh tơmơ̆t jên jang lơ tơdrong jang lơ̆m tơring kon pơlei kon kông, mă loi ‘noh jĭ tơdrong jang tơm teh đak găh pơjing tơring tơrang ‘nao hlôi tơgŭm um ai tơring tơrang đei tơdrong tơplih rơđăh ‘lơ̆ng, tơdrong hơrih sa tơmam drăm păng jơhngơ̆m đon kơ kon pơlei ưh kơ đei pơdơh đei hơtŏk ‘lơ̆ng. Kơsô̆ ŭnh hnam dơnuh hin lơ trong jur hrĕnh dang ei oei pă hơla kơ 2%, lơ̆m noh ŭnh hnam dơnuh hin tơring kon kông oei 5,4%, jur hloh 3% pơting hăm sơnăm 2023.

Vă hơnơ̆ng pơtrŭt hơtŏk tơiung mŭk drăm păng tơdrong hơrih sa, tang măt rim răih kon pơlei lơ̆m bơngai kon kông tơ̆ dêh char Lâm Đồng hlôi tơroi lơ nơ̆r tơgop, apĭnh, nhen kăl kơ tơgŭm hơdrol tơchă ăn tơdrong jang hăm kon oh bơngai kon kông đơ̆ng rŏng hŏk đang đăi hŏk, kao đăng; tơdrong jang pơtho pơhrăm tơdrong jang athei mă lăp hăm tơdrong hiôk yan âu; tơgŭm pơjing tơdrong jang sa hơtŏk tơiung mŭk drăm ŭnh hnam đei yua vă pơih să.