Hloh đơ̆ng Hop akŏm pơdrơ̆ng dih băl ‘măng mă pêng, dêh char Lâm Đồng hlôi drơ̆ng mĭnh nơ̆r rơih, chih hơnăn 21 ‘nu bơngai đei tôm tơdrong pơkăp lơ̆ng ăn pơjei pơm kơdră tag măt Kuô̆k hô̆i jăl XVI păng 133 ‘nu đei tôm tơdrong pơkăp pơjei pơm kơdră tang măt Jơnum vei lăng kon pơlei dêh char Lâm Đồng jăl jang 2026 – 2031, sơđơ̆ng ƀlep tơdrong proh hơmet kiơ̆ tơdrong tơchơ̆t. Lơ̆m dêh char hlôi pơjing 124 Hơnih pôk rơih tơring; 6 Hơnih pôk rơih kơdră tang măt Kuô̆k hô̆i păng 38 Hơnih pôk rơih kơdră tang măt Jơnum vei lăng kon pơlei dêh char. Kiơ̆ kơ yă Phạm Thị Phúc, Kơ iĕng Kơdră chĕp pơgơ̆r Đảng dêh char, Kơdră chĕp pơgơ̆r Hơnih bơ̆ jang MTTQ Việt Nam dêh char Lâm Đồng, tơdrong pơkeh hop akŏm pơdrơ̆ng dih băl ‘măng mă pêng ‘noh trong kăl hloh vă dêh char hơnơ̆ng tơlĕch rim trong jang tơ̆ hơnăp lơ̆m bơ̆ jang pôk rơih, lăng truh pơgơ̆r ‘măng pôk rơih tơpăt ‘lơ̆ng ƀlep khôi luơ̆t, sơđơ̆ng păng tơpă jĭ năr lêh kơ pơđĭ kon pơlei.