Dêh char Lâm Đồng dang ei đei 180km trong kơdou hrenh, hơtaih jê̆ 1.400km trong tih păng jê̆ 1.300km trong lơ̆m dêh char. Lơ̆m dôm khei 'mi kial ou ki, jăl trong tơm kơ dêh char Lâm Đồng nhen: 20, 27, 28B, 55…hlôi ƀôh lơ hơnih hơlih, đak lơ̆p pơm tơhlăk tơhlĭn trong nơnăm.

Anih jang vei lăng kon pơlei dêh char Lâm Đồng pơgơ̆r dôm anih jang kơpal tơrĕk kăp gĭt gah tơdrong vei sơđơ̆ng trong nơnăm tơ̆ dôm anih đei teh hơlih, đak lơ̆p hơdrol kơ tơmơ̆t hơdai dêh char Lâm Đồng, Đăk Nông, Bình Thuận. Tơrĕk truh teh hơlih tơ̆ jăl trong 14 tơ̆ Gia Nghĩa, dêh char pơgơ̆r lơ̆m khei 'mi kial athei asong bơngai gak hơlen măng năr hloi, kơchăng kơmăi kơmŏk vă tơtom hơmet mưh đei sar bar.