Gah 8 tơdrong đei akŏm pơm kiơ̆ noh dôm tơchơ̆t dơnơm, Tiến sỹ Bàn Tuấn Năng, Jơnŭm bơngai Hŏk kơjung Khua hŏk păng Kŏng ngê̆ sơnăm mơlôh Việt Nam, tơrĕk kăp gĭt truh tơdrong joh ayŏ păng kon bơngai: Tơdrong tơm đon bơnôh kơ tơpôl, jơhngơ̆m pran đei kơdih akŏm vă hơtŏk tơ-iung teh đak. Hla bar chih tơbang ah Hop akŏm mă 14 kơ Đảng hlôi ră hơdah: “Hơtŏk tơ-iung kơjăp sơđơ̆ng hơdrol hloh noh athei gơnơm lơ̆m kon bơngai păng joh ayŏ.

Athei pơjing păng pơm kiơ̆ drơ̆ng minh kơjă pơkăp kơ teh đak, kơjă kăp gĭt kơ joh ayŏ, kơjă kăp gĭt kơ unh hnam păng trŏ tơpă kơ kon bơngai Việt Nam pơtrŏ hăm tơdrong tơchơ̆t hơtŏk tơ-iung lơ̆m chăl sơnăm 'nao…” Tiến sỹ Bàn Tuấn Năng tơblang: "Joh ayŏ hơnơ̆ng đei lăng jĭ chơnang vei, jĭ tơdrong tơm kơ đon bơnôh kăp gĭt hloh. Tơdrong tơm đon bơnôh noh pơjing jơhngơ̆m pran, jĭ tơdrong dơnơm vă hơtŏk tơ-iung teh đak. Gah hơtŏk kơtang pơtho pơhrăm nhen khei năr ou ki, bơ̆n ƀôh đei minh ƀar trong pơkăp tơgŭm nhen: ưh đei iŏk jên hŏk ăn hŏk tro, drơ̆ng minh gah săch yăo khua lơ̆m jơ̆p teh đak... 'Noh jĭ dôm tơdrong hơtŏk tơ-iung kơtang hloh, kơjăp hloh mă Tổng Bí thư hlôi pơgơ̆r jang păng Jơnŭm pơgơ̆r teh đak, rim hơnih jang tơm tŏk bŏk oei pơm jang".

Ƀok Nguyễn Quang Đồng, Kơdră Viê̆n chih hơlen Pơkăp tơgŭm păng Hơtŏk Tơroi tơbăt (IPS) tôch lăp đon gah tơdrong pơkăp Khua hŏk, kŏng ngê̆, tơplih 'nao gơh hơgei păng tơplih kơmăi kơsô̆: Jơhngơ̆m pran dơnơm kơ hơtŏk tơ-iung. Ƀok ăn tơbăt: "Nhôn hlôi đang măt ƀôh tơchơ̆t hơtŏk tơ-iung juăt jue lơ̆m 40 sơnăm đơ̆ng rŏng tơplih 'nao hlôi đei jơnei hơdah. Mưh ưh đei tơdrong asong jang kơtang ăn khua hŏk kŏng ngê̆ noh ưh kĕ hơtŏk kơtang tơdrong tơplih 'nao păng hơtŏk tơdrong pơm jang, kiơ̆ đơ̆ng noh hơtŏk đei hơnih dơ̆ng kơ Việt Nam lơ̆m tơdrong pơkăp jang lơ̆m teh đak păng lơ̆m apŭng plenh teh. Kơyuơ noh inh tơchĕng, hơtŏk jang kơtang gah khua hŏk kŏng ngê̆ jing tơdrong dơnơm kăl hloh nhen tơchơ̆t đei chih lơ̆m Hla bar kăl hlôi tơbang".

Drơ̆ng nơ̆r hăm đon kơchĕng ou, ƀok Vũ Hoàng Liên, Kơdră Jơnŭm jang gah Internet Việt Nam, tơƀôh hơdah tơdrong tơgŭm hăm dôm tơchơ̆t tih gah hơtŏk khua hŏk kŏng ngê̆, joh ayŏ păng kon bơngai đei tơbang lơ̆m hla bar chih kăl pơtruh ah Hop akŏm 14 kơ Đảng:  "Tơpă trŏ hăm trong hiôk păng trŏ hăm dôm tơdrong đei ƀôh păng tơdrong jang xa tơ̆ Việt Nam, kon bơngai Việt Nam. Tơdrong pơgơ̆r thoi ou 'noh tơtom păng trong hiôk ăn Việt Nam lơ̆m tơdrong pơjing đei tơdrong hơtŏk kơtang kơjăp athei gơnơm lơ̆m khua hŏk kŏng ngê̆, tơplih 'nao gơh hơgei păng tơplih kơmăi kơsô̆".