‘Năr 27/1, Công an xăh Nhân Cơ, dêh char Lâm Đồng tơroi hlôi tơlĕch hla ar rôp hăm 2 ‘nu bơngai ‘nŏh jĭ N.N.Q (rơneh sơnăm 1990, oei tơ̆ xăh Nhân Cơ) păng Đ.V.T (rơneh sơnăm 1997, oei tơ̆ xăh Thuận Hạnh) găh tơdrong glăi tĕch tơmam kâm ‘nŏh jĭ kơmlăi.

Adrol kơ ‘nŏh, kơmăng 23/1, Công an ƀôh N.N.Q oei chơ 7 kơ hôp kơmlăi pơkao kơloăi 49 găr 1 kơhôp; khăm hơlen anih oei sư ‘nŏh thu iŏk dơ̆ng 2 kơhôp kơmlăi thoi âu. Đơ̆ng nơ̆r tơroi, khul jang kơpal băt kơsô̆ kơmlăi âu yoa Đ.V.T tĕch păng đei nơ̆r athei bơngai năm tơ̆ anih jang kơpal. Hơdai lơ̆m năr, Công an phường Tân An, dêh char Đắk Lắk kŭm rôp vei Bùi Quang Nhật (33 sơnăm, oei tơ̆ phường Tân An) yoa tĕch ôn kơmlăi; bơngai âu răt 4 kơ hôp kơmlăi pơkao răt ôn, trăp dang 7kg kiơ̆ mang tơpôl păng ôn tơ̆ hnam ‘nŏh đe rôp.