Tơ̆ Đăk Lăk, hơdah noh kơmăng hơri hơsuang countdown (jô̆ hơlơ̆k) tơ̆ Cham să 10/3, phương Buôn Ma Thuột ah kơmăng năr 31/12 hăm tơdrong joh ayŏ hơnăn “Ang bang Đăk Lăk – Sơng sơnăm 'nao 2026”. Tơdrong joh ayŏ đei hơmet tơnăp 'lơng, đei tơdra hơri păng unh pơchră ang hăm kơmăi kơmŏk 'nao, đei lơ bơngai ƀơ̆r hơri hiôk, khul joh hơri hơsuang, DJ păng lơ khul ayŏ kơdŏ suang gơh hơgei nai.

Atŭm hăm noh, pơgê năr 1/1/2026, tơ̆ Mũi Đại Lãnh (Mũi Điện) xah Hòa Xuân, gô pơgơ̆r Lêh chao kơ blŭng sơnăm 'nao, tơguăt hăm tơdrong akŏm sơng tơmoi truh tơmang mă blŭng chă tơmang lăng hơnih sơng 'năr lĕch hrôih hloh tơ̆ tơring teh Việt Nam. Tơ̆ ou, pơgơ̆r tơdrong joh ayŏ kơdŏ suang sơng sơnăm 'nao, hăm dôm tơdrong pơdah tơmam reh tôn kon kông, chĭng tơmo păng dôm tơdrong akŏm asong tơmam ăn tơmoi truh tơmang...

Gơmăng 31/12, dêh char Gia Lai pơgơ̆r pơih pơdăh tơpăt tơdrong Countdown năr Tết tây 2026, pơjing jơhngâm tơdrong hưch hanh, chơt hơiă, mât 1 jơhngâm păng hơmĕng jang tŏk. Tơdrong jang đei hơnăn “Tơ̆k hơdăh unh lơ̆m plei nuih – Tơguăt tơdrong ‘mêm kơ eng”, đei pơih pơdăh tơpăt tơ̆ 2 anih ‘nŏh: Cham xă Nguyễn Tất Thành (phường Quy Nhơn) păng cham xă Đại Đoàn Kết (phường Pleiku), hăm anih jŏh ayŏ kơ dŏ xoang đei pơm hơmet tôch ‘lơ̆ng, hơdai hăm jơva re, unh pơchrang păng màn hình LED tôch tih. Mă loi, tơ̆ anih pơih pơdăh Pleiku, tơdrong juăt tôn chĭng chêng Tây Nguyên đei pơgơ̆r vă pôk pơ ư tơdrong tôn chĭng, hơxoang kŭm hăm lơ ƀai hơri hơxoang tôch hơiă đơ̆ng bri kông, tơƀôh hơdăh tơdrong mât hơdai tôch hơiă đơ̆ng tơdrong juăt so hăm chăl arih ‘nao. Kiơ̆ đơ̆ng tơdrong joh ayŏ kơ dŏ xoang âu, dêh char Gia Lai hơmĕng pơjing đei um rup ‘lơ̆ng rŏ, pơjing jơhngâm pran ăn sơnăm 2026, Gia Lai iŏk pơgơ̆r Sơnăm Chă tơmang lăng kơ teh đak.

Dêh char Quảng Ngãi pơgơ̆r lơ tơdrong akŏm joh ayŏ, tơmang pơhiơ̆ pơgơ̆r hơdoi tơ̆ tơring tơjih đak dơsĭ păng tơring groi kông. Tơdrong joh ayŏ kơdŏ suang “Quảng Ngãi – Sơng sơnăm 'nao 2026” pơgơ̆r ah kơmăng năr 31/12 tơ̆ 2 hơnih: Cham să trong Phạm Văn Đồng, phương Cẩm Thành hăm hơnăn “Hơpơi 'meh đak dơsĭ să” păng ah Cham să 16/3, phương Kon Tum hăm hơnăn “Jơhngơ̆m bri kông”. Pơtoi kơ noh, Giĕng Joh ayŏ – Tơmang pơhiơ̆ Măng Đen hăm hơnăn “Guăng 'lơ̆ng tơring bri kông” pơgơ̆r đơ̆ng năr 1–4/1/2026, tơ̆ xah  Măng Đen.

Giĕng lêh akŏm ou oei đei lêh akŏm khinh khĭ kou, tơdrong joh hơri “Măng Đen năr 'nao”, akŏm kơchơ tơmam choh pơtăm – 'long pơm pơgang Măng Đen 2026, hơlen băt gah tơdrong pơm đak nhă et păng huch kaphê kăp gĭt, atŭm hăm dôm tour tơmang pơhiơ̆ cham char.