Tơ̆ Hà Nội, kơdrơ̆m kon pơlei Hơnih tơm păng tơmoi teh đak đe tơmang pơhiơ̆ hlôi luh năm tơ̆ pơlei tơm, tăp dăr hnam khop Lớn, Hồ Hoàn Kiếm... sơng Noel. Gơmăng Noel tơngiĕt păh ai, pơjing rơvơn ăn rim tơdrong pơgơ̆r pơchơt pơhiơ̆, tơmang pơhiơ̆ kơ kon pơlei. Ưh khan lăp tơ̆ rim trong tơm tăp dăr Dơnou Hoàn Kiếm, bro tơ̆ hơnăp Hnam khop Lớn jei pơm ăn lơ tơmoi tơmang pơhiơ̆ năm truh đơ̆ng hrôih vă chă tơmang lăng, phin rup. Lơ̆m lăm hnam khop, đei chă pơrŏ tôch ‘lơ̆ng liĕm, ŭnh kơđeng pơrŏ ƀrŭng ƀrăng păng rim hơnih pơrŏ ‘lơ̆ng liĕm tơbăt hơdăh găh mĭnh gơmăng pơm lêh sơđơ̆ng ‘lơ̆ng rŏ, hơvơn đei lơ kon pơlei păng tơmoi năm tơmang lăng.

Pơyan Nô-el tơ̆ Đăk Lăk rơ-ông rơ-ang jơ̆p jang, hăm hơyuh 'năr tơngiĕt iơ iă kơ tơring Tây Nguyên. Dôm jăl trong năm truh dôm tơring khop, hnam khop đei pơrŏ guăng 'lơ̆ng. 'Nguaih kơ Hnam khop Tơm, rim hơnih tĕch huch kaphê, hơnih tĕch tơmam đei pơrŏ 'lơ̆ng kơ măt, pơjing đei dôm hơnih guăng 'lơ̆ng kăp gĭt.

Minh pơyan sô̆ hơ-iă, tơnŏ, kon pơlei kiơ̆ khop atŭm pơkăp truh khei năr hơnô̆ hơnăp kơnh kơ pơlei pơla roi năr roi hơtŏk tơ-iung. Kon pơlei akŏm sô̆ pơyan Nô-el tơ̆ Hnam khop Tơm Ban Mê Thuột tơnŏ păng sô̆ jơnap lơ̆m đon bơnôh hăm tơdrong grasia.

Gơmăng năr 24/12, Đà Lạt nhen tơhrŭk ăn kơ dih ao ‘nao ƀĕnh ƀang kơmou ‘lơ̆ng liĕm. Tŏk bok lơ̆m tŭk, ŭnh kơđing bơblŏng đơ̆ng rim hơnih hnam khop păng dôm ƀai hơri Noel ‘lơ̆ng rŏ jơ̆p trong kơphô̆, tơbăt hơdăh mĭnh pơyan Noel ƀĕnh ƀang hơnuk hơnoa, sơđơ̆ng ‘lơ̆ng rŏ lơ̆m tơring rơbou pơkao. Mă kăl hloh ‘noh hơnih Hnam Khop tơm Đà Lạt.

Hnam khop tơm Đà Lạt ƀrŭng ƀrăng lơ̆m gơmăng Noel.

Tŏk bŏk lơ̆m jơ ‘năr ‘lơ̆ng rŏ, ‘long hơngo Noel tôch kơtih atum hăm rơbou kơđeng led ƀrach hơdăh, hơvơn đei rơbou ‘nu kon pơlei păng tơmoi. Adoi, 21 Hnam khop tơ̆ phương tơm Xuân Hương- Đà Lạt jei ƀrŭng ƀrăng ƀrach hơdăh lơ̆m gơmăng pơm lêh, hlôi jing hơnih ‘lơ̆ng rŏ hloh ưh kơ gơh kơ lon mă đơ̆ng kon pơlei, tơmoi lui dăh mă ưh. Tơ̆ rim pơlei pơla bơngai K’ho jei rơ ông rơ ang vang vơch chơt hơ iă sơng năr kêh gĭt kăl, krao khan ăn sơnăm ‘nao ‘lơng rŏ hơbŏ nhen, phĭ tơtŏ dơnŏ ‘lơ̆ng, hơnŭk hơnoa.