Khŭl kơdră chĕp kơ̆l rim tơring tŏk bŏk hăt hot tơlĕch dôm trong jang tơjră, roi tơbăt kơ kon pơlei kơchăng vei sơđơ̆ng. Tơ̆ Đắk Lắk, ‘mi tih pơm ăn 1,2 tơring kon pơlei oei tơ̆ xăh M’Drắk đei đak lơ̆p. Khŭl kơdră chĕp kơ̆l păng rim pơlei hlôi pơgơ̆r hơlen lăng, tơgŭm kon pơlei chơ mŭk drăm, krao hơvơn dôm unh hnam tơ̆ tơring krê hơmơt truh tơ̆ hơnih oei sơđơ̆ng. Tơ̆ xăh Cư Prao, ‘mi tih pơm ăn đak lơ̆p tơ̆ dôm trong năm klĕch thong đak. Kŏng an xăh hlôi hơtơ̆p kơƀang roi tơbăt, dăng tơley găn bơngai păng gre yak vih vơ̆t tơ̆ dôm hơnih krê hơmơt. ‘Mi tih pơdui đunh pơm hơtŏk hơmơt kơ đak tih tơ̆ dôm dak krong, thong đak, đak jroh, teh hơlih păng đak lơ̆p tơ̆ tơring thŭng. Khŭl kơdră rim tơring pơtho tơtă kơ kon pơlei ‘nĕ kơ năm rok gơng, trong năm klĕch thong đak, tơring đak lơ̆p jrŭ dăh mă đei đak ro jăng; pơm kiơ̆ dôm hơnih roi tơbăt, ưh kơ gơh chă năm kơdih klĕch hơnih var găn.

Anih vei lăng kon pơlei xăh Canh Vinh, dêh char Gia Lai kâm bơngai păng gre yak vih vât tơ̆ trong krang Nha Sam đơ̆ng rŏng kơ ƀôh teh hơđang tơ̆ kơpal taluy yoa ‘mi tih lơ̆m dôm năr âu ki. Tơdăh 'mi đei hơnơ̆ng dơ̆ng, đak 'mi hrơm mât lơ̆m teh, pơm ăn teh klĭ tôch hơmơt hơlih jur tơ̆ trong. Khul kơdră tơring hlôi đei hla ar chih kâm, ưh ăn bơngai păng gre yak tơ̆ trong 'nâu. Công an xăh Canh Vinh jang hơdoi hăm khul linh pơm anih gak, roi tơƀôh trong yak.

Kŭm hăm Canh Vinh, dang ei, lơ tơring lơ̆m dêh char Gia Lai kŭm đei lơ anih hơmơt teh hơlih, đak lip. Mă hơdăh, xăh Tây Sơn đei 8 anih hơmơt đak lip păng 11 tŏ trong gre rŏ năng gô đei đak lơ̆p. Tơ̆ phường Quy Nhơn, hlŏh 30 unh hnam tơ̆ tơring kông Một kŭm đei nơ̆r athei tŏk oei tơ̆ anih sơđơ̆ng; xăh Đề Gi pôk rĭ 33 unh hnam hăm 111 'nu bơngai tơ̆ plei Đức Phổ păng Cát Khánh lĕch đơ̆ng tơring hơmơt đei teh hơlih tơ̆ hơla jơ̆ng kông Gành.