Tơ̆ tơring tơjih đak dơsĭ dêh char Đăk Lăk hlôi đei 'mi tih păng kơmlat đơ̆ng kơmăng năr 8/11. Hăm tơdrong tơroi tơbăt đei 'mi tih, kon pơlei tơ̆ tơring klŭng tơjih Đak krong Pa, đak krong Bàn Thạch păng đak krong Cái hlôi keh đang dôm hơnih oei tang găn đak hơbông. Unh hnam kĕ đei ƀiơ̆ noh pơm hơnih oei kơjăp hloh, unh hnam tơnap tap noh chă iŏk tơ̆ pĕng găn, pơjing hơnih oei ah hơnih kơjung hloh lơ̆m hnam. Ƀok Nguyễn Chánh Hướng, oei tơ̆ bro Chùa, thôn Ngọc Phước, phường Tuy Hòa ăn tơbăt: "Lăng atŭm dang ei bu bu kŭm pơm hơnih oei tang găn kơ đak hơbông, ƀôh đang măt krê hơmơt dêh. Unh hnam yơ đei ƀao noh klŭ phe ƀa hơtŏk đĭ tơ̆ kơpal"

Đơ̆ng rŏng kơ 'mi kial đak hơbông sơnăm sơ̆ pơm kơhrrĕng tấn ƀa hư răm, sơnăm ou, kon pơlei tơrĕk gah vei lăng ƀa hơdrĕch păng mong tơmam drăm xa. Ƀa đei 'măn lơ̆m ƀao ni lông, chô̆ hlơp hơtŏk tơ̆ hơnih kơjung. Gre honđa, kơmăi kơmŏk điện tử, hơbăn ao, khăn buk... kŭm đei tah lơ̆m ƀao ni lông vă hoai kơ răm ah đak ro mơ̆t truh tơ̆ hnam. Tơ̆ dôm tơring ƀơm đak lơ̆p jrŭ, lơ unh hnam hlôi kơchăng hơmet tôm tơmam drăm xa 'măn yua đơ̆ng 5 truh 7 năr. Ƀok Trần Tấn Mạnh, tơ̆ tơring Tây Hòa ăn tơbăt: "Hơmŏ đơ̆ng đak nhă truh tơmam drăm xa, ‘măn ah hơnih kơjung vă hoai kơ tơnap tap ah ‘mi kial đak hơbông truh"

Đơ̆ng tơdrong kơchăng đơ̆ng rim unh hmam truh tơdrong tơlĕch jang đơ̆ng jơnŭm pơgơ̆r tơring, tơlĕch jang kiơ̆ “4 tơ̆ tơring” pơtoi đei sơkơ̆t hơdah jĭ sơnong jang tơm. Jơnŭm pơgơ̆r Hơmŏ tơgŭm kon pơlei dêh char Đăk Lăk pơgơ̆r hăm rim tơring chih akŏm dôm tơdrong jang tơguăt hăm rim tơring, rim tơdrong răm đei ƀôh. Ƀok Đỗ Hữu Huy, Kơdră Hơnih vei lăng kon pơlei dêh char Đăk Lăk ră hơdah, sơnong jang kơ jơnŭm pơgơ̆r tơring lơ̆m pơgơ̆r tang găn păng tơjră ‘mi kial đak hơbông pơrăm: "Inh tơchĕng athei jang kiơ̆ pơkăp 4 tơ̆ tơring: Pơgơ̆r jang tơ̆ tơring, khul pơm jang tơ̆ tơring, tơmam drăm hlôi đei tơ̆ tơring păng rim bơngai vang tơgŭm tơ̆ tơring, asong mah tơmam drăm kăl. Kơdră Hơnih vei lăng kon pơlei rim xah, phường jĭ bơngai chiu pŭ sơnong jang tôm tơdrong, athei kơtă pơgơ̆r jang tơ̆ hơnih ƀơm răm. Asong tơdrong jang ăn kơ xah năm hơlen lăng tơ̆ rim thôn, kueng kơphô̆ kăp gĭt"

‘Mi kial roi năr roi hơbuh hli, tơnap kơ hơlen băt. Tơdrong hơmŏ hơdrol đơ̆ng rim unh hnam, atŭm hăm trong tơlĕch jang vă tơjră ‘mi kial đơ̆ng jơnŭm pơgơ̆r tơring, gô tơgop tang găn răm, tơjur ƀiơ̆ tơnap tap ăn khul jang tơgŭm dŏng păng tơjur ƀiơ̆ tơdrong răm lơ̆m rim ‘măng ‘mi kial đak hơbông truh.