Hloh 70 sơnăm, kră pơlei Y Yơng Niê Kdăm, ƀuôn Ea M’Droh, tơring Ea M’Droh, dêh char Đắk Lắk, oei hơngŭr hăm dôm tơdrong jang kơ pơlei. Lơ̆m rim ‘măng hop akŏm pơlei, rim ‘măng chă pơma dơnuh dih băl ou to, ƀok hơnơ̆ng chă pơtho khan ăn kon pơlei vei kơjăp tơgoăt pôm nơ̆r ƀơ̆r đon, pơm kiơ̆ kơjăp khôi luơ̆t, vei lăng năng tông tơdrong hŏk pơhrăm kơ kôn mon kon sou. Mưh lơ̆m pơlei đei tơdrong chă tơhil dih băl, ƀok vang xek tơlang, tơgŭm ăn rim ŭnh hnam băt chă pơtruh dih băl. ‘Nhŏng Y Knap, thôn trơng ƀuôn Ea M’Droh tơbăt, dôm tơdrong jang kơ kră pơlei ‘noh jĭ trong jang gĭt kăl hloh vă jơhnơr mơlôh hŏk pơhrăm, kiơ̆ yok rok jơ̆ng lơ̆m tơdrong bơ̆ jang tơ̆ tơring pơlei.“Ba hôn tơpă mơ̆n tơdrong tơgop đơ̆ng kră pơlei Y Yơng lơ̆m chă pơrô̆ hơvơn kon pơlei tơgoăt pôm nơ̆r ƀơ̆r đon adoi nhen lơ̆m rim tơdrong jang pơtho tơbăt khôi luơ̆t găh tơdrong hơrih sa, tơdrong xek tơlang rim 'măng chă tơhil dih băl, tơlang ăn lơ̆m pơlei. Hăm kon pơlei ‘noh nơ̆r pơma đơ̆ng kră pơlei jĭ tôch kơ kăl. ‘Nou jei jing tơdrong vă rim jơhnơr mơlôh nhen nhôn kăl hŏk pơhrăm păng kiơ̆ yok rok jơ̆ng.”

Ƀuôn Ea M’Droh oei đei băt truh hơnăn krao Ƀuôn Cháy, tơklep kơjăp hăm khei năr dăr sơnăm kon pơlei mĭnh nơ̆r ƀơ̆r đon kiơ̆ kĕch mang, pơlei pơla răm ayăt soh hŭt pơgoh hnam lơ̆m chăl sơnăm tơblăh vang sơ̆. Pơlei hrei ou đei 307 ŭnh hnam hăm vă jê̆ 1.300 ‘nu bơngai, đĭ đăng ‘noh kon pơlei bơngai Êđê. Đơ̆ng groi teh hiong răm lơ tơdrong, Ƀuôn Cháy hrei ou hlôi đei trong thơ thŭr ‘lơ̆ng liĕm, lơ ŭnh hnam atŏk tơ iung jang chehphe, roi năr roi đei tơdrong hơrih sa sơđơ̆ng dơ̆ng kơjăp.

Jĭ bơngai tơklep kơjăp hăm tơring kăn kư̆ kech mang sơ̆, kră pơlei Y Yơng ƀôh hơdăh tơdrong tơplih ‘nao kơ pơlei đơ̆ng rŏng teh đak rơngei hiôk hian. Yak hloh lơ tơdrong jang phara dih băl, kră pơlei Y Yơng ling lang pơtho khan ăn kon pơlei oei kơjăp tơgoăt tơgoăl pôm nơ̆r ƀơ̆r đon, adoi lăng ba kơjăp hloh dơ̆ng truh tơdrong hơrih sa dang ei:“Chă pơrô̆ pơtho khan ăn kon pơlei găh trong bơ̆jang đơ̆ng Đảng păng Teh đak. Nhen dang ei ba pơtho khan ăn kon pơlei ƀôh hơdăh găh tơdrong đe chă pơchŭt pơdôr pơm tơdrong ou to ‘noh ba ‘nĕ kơ put, vei kơjăp oei sa gơh găt băt ‘mêm kơ eng dih băl. Đơ̆ng rŏng hơgrop mơ̆t lơ̆m ou ‘noh pơrô̆ pơrôp kon pơlei, mă kăl hăm đe hơ ioh, lăng tông nông gia ăn đe hăp hơdrin hŏk pơhrăm trŏ ƀlep hăm trong tơlĕch jang đơ̆ng Đảng păng khôi luơt kơ Teh đak.”

Tơring Ea M’Droh hrei ou đei pơjing kiơ̆ hơgrop pêng tơring Ea M’Droh, Ea Mnang hăm Quảng Hiệp. Lơ̆m 2 sơnăm ou ki, ‘moi kiơ̆ Tơdrong jang tơm teh đak tơjur dơnuh kơjăp ‘lơ̆ng, tơring hlôi tơgŭm djru 76 tŏ rơmo yŏng ăn 38 ŭnh hnam kon pơlei. Lơ̆m tơring hlôi tơjur 55 ŭnh hnam dơnuh, lơ̆m ou đei 44 ŭnh hnam kon kông. Kiơ̆ đơ̆ng ƀok Trần Doãn Tới, Bí thư Đảng tơring Ea M’Droh, rim trong jang tơgŭm djru đơ̆ng Teh đak đei tơlĕch jang kiơ̆ ƀlep tơdrong hơpơi ‘meh vă kơ rim ŭnh hnam. ‘Ngoăih khul kơdră chĕp pơgơ̆r tơring păng rim khul jang, kră pơlei, thôn trơng, bơngai đei kon pơlei lui yom đei hơnăp jang tôch gĭt kăl lơ̆m tơdrong hơlen hơdăh dôm tơdrong tơnap tap tơ̆ tơring; pơrô̆ pơrôp, pơjing đei drơ̆ng mĭnh nơ̆r đơ̆ng kon pơlei.“Kră pơlei hlôi jang kiơ̆ ‘lơ̆ng jơhngơ̆m đon kĕch mang, hơnơ̆ng jing tơpang ti trơ trơp dih băl kơjung hloh dơ̆ng đơ̆ng Đảng păng kơdră chĕp pơgơ̆r tơring, tơgop tih tên lơ̆m tơlĕch jang kiơ̆ tơdrong tơchơ̆t, trong bơ̆ jang đơ̆ng Đảng mơ̆t lơ̆m tơdrong hơrih ‘moi kiơ̆ rim ‘măng hop akŏm pơlei, pơtho khan ăn kôn mon kon sou. Tơgop lơ̆m tơ iung pơjing khul jang chinh trĭ tơ̆ pơlei pơla, atŏk tơ iung mŭk drăm tơpôl păng mă kăl ‘noh tơdrong vei răk tơƀăk mong păng atŏk tơ iung tơdrong oei sa joăt joe ‘lơ̆ng rŏ sơ̆ ki kơ kon pơlei pơla kơtă. ‘Nou jĭ jơhngơ̆m đon ‘lơ̆ng vă jơhnơr mơlôh adoi nhen kon pơlei pơla lơ̆m pơlei kiơ̆ yok rok jơ̆ng.”

Ưh khan lăp hăm nơ̆r pơma, rim kră pơlei, bơngai đei kon pơlei lui yom tơ̆ rim pơlei pơla Đắk Lắk oei tơgoăt kơjăp tơdrong pơrô̆ pơrôp kon pơlei hăm atŏk tơ iung muk drăm, hơmet pơ ‘lơ̆ng tơdrong hơrih sa. Tơ̆ thôn Phước Tân, tơring Tây Sơn, ƀok La O Lanh, hơdrung Chăm, sơnăm ou 74 sơnăm, oei hơdrin choh jang sa păng vang iung jang dôm tơdrong jang tơpôl. Ƀok pơrô̆ pơrôp kon pơlei vei kơjăp tơgoăt pôm nơ̆r ƀơ̆r đon, xek tơlang dôm tơdrong chă tơhil dih băl lơ̆m pơlei pơla, adoi vei lăng năng tông choh jang sa, jang kiơ̆ kih thuơ̆t păng iŏk yoa trŏ lăp groi teh. Ƀok La O Lanh akhan, ‘meh vă kon pơlei lui yom păng pơm kiơ̆ lei kơdih bơ̆n kăl pơm jŭk yuk trong hơlou, nơ̆r pơma tơ-‘ngla iung jang hloi.“Jĭ bơngai đei kon pơlei lui yom kăl pơm jŭk yŭk trong hơlou ‘mơ̆i kơna kon pơlei mă kiơ̆ yok rok jơ̆ng. Mă đơ̆ng ba sơnăm đĭ kră ră bơih mălei oei hơnơ̆ng choh jang sa đĕch vă pơrô̆ pơrôp pơtho khan ăn kon pơlei sut sa pơngot rơvĕt tơjur dơnuh hin, hơdrin pơrô̆ pơtho tơbăt vă kon pơlei kiơ̆ yok rok jơ̆ng, vang hơdrin kĕ yak hloh dơnuh hin kơjăp ‘lơ̆ng.”

Đắk Lắk dang ei đei 1.546 thôn, pơlei, kueng kơphô̆ hăm 1.069 'nu bơngai đei kon pơlei lui yom lơ̆m tơpôl. Hăm tơdrong tơguăt, hlôh vao hăm dih băl păng jang tơnăp hăm pơlei pơla, đe yă ƀok ou jing dôm bơngai pơdjoi jơnŭm pơgơ̆r tơring hăm kon pơlei, tơgŭm ăn jơnŭm pơgơ̆r tơring 2 cấp dah hrôih pơm jang đei jơnei 'lơ̆ng.

Ƀok Lương Nguyễn Minh Triết, Bí thư Tỉnh ủy Đắk Lắk sơkơ̆t hơdah, lơ̆m khei năr hơtŏk tơ-iung 'nao, kră pơlei, kơdră pơlei, bơngai đei kon pơlei lui yom jing khul jang kăp gĭt lơ̆m tơdrong hơmet hơtŏk tơdrong tơguăt tơguăl tôm kon pơlei: “Rim bơngai đei kon pơlei lui yom lơ̆m tơpôl, nhen kră pơlei, kơdră pơlei jing dôm bơngai tơjê̆ hăm kon pơlei hloh, hlôh vao kon pơlei hloh păng kŭm đei nơ̆r pơma trŏ ƀlep hloh hăm kon pơlei. Dêh char hơnơ̆ng hơpơi 'meh đe yă ƀok ou pơtoi pơm jang, yuk trong hơlou, băt hơdah tơdrong đei lơ̆m tơring kon pơlei. Tơpă jing gơng tơroh đon lui đơ̆ng rim jăl pơgơ̆r tơring păng kon pơlei vă hơvơn kon pơlei pơm kiơ̆ 'lơ̆ng tơchơ̆t đơ̆ng Đảng, đơ̆ng khôi luơ̆t teh đak, atŭm hăm noh chih akŏm nơ̆r pơtruh păng tơdrong hơpơi 'meh đơ̆ng kon pơlei truh hăm Đảng păng jơnŭm pơgơ̆r tơring”

Tơchơ̆t 307 đơ̆ng Jơnŭm pơgơ̆r teh đak, đei iŏk yua đơ̆ng khei 9 sơnăm ou, pơtoi jang hơdah tơchơ̆t tơgŭm bơngai đei kon pơlei lui yom lơ̆m tơring kon pơlei kon kông, mă kăl noh gah tơdrong tơroi tơbăt, hơtŏk tơdrong jang pơrô̆ pơrôp kon pơlei. 'Nou jĭ tơdrong tơm vă rim tơring pơtoi akŏm bơngai đei kon pơlei lui yom, tơgŭm ăn đe sư vang yak hơdoi hăm kon pơlei lơ̆m tơdrong jang hơtŏk mŭk drăm, tơjur hin dơnuh păng pơjing tơdrong hơrih tơ̆ pơlei pơla roi năr roi 'lơ̆ng hloh.