Kơsơ̆ măng năr 9/11, Thủ tướng Nhật Bản Takaichi Sanae hlôi pơgơ̆r lêh kăp gĭt sơng Tổng Bí thư, Kơdră teh đak bơ̆n Tô Lâm. Đơ̆ng rŏng kơ lêh sơng, Thủ tướng Nhật Bản păng Tổng Bí thư, Kơdră teh đak bơ̆n chĕp kơ̆l khul kơpal kơ 2 teh đak akŏm pơma đam. Việt Nam păng Nhật Bản pơtơm iung jang tơbôl ah sơnăm 1973. Găn ga hloh 50 sơnăm hơtŏk jang tơbôl đơ̆ng Việt Nam păng  Nhật Bản hơnơ̆ng đei hơtŏk lơ̆m tôm tơdrong jang. Nhật Bản hơnơ̆ng jing minh lơ̆m dôm teh đak jang hơdoi gah mŭk drăm kăp gĭt păng jing teh đak tơgŭm ODA tih hloh ăn Việt Nam.

Roi năr roi đei lơ hơnih jang mŭk drăm Nhật Bản lơ̆m dôm tơdrong jang kơmăi kơmŏk 'nao, mă kăl noh gah kơ̆l 'ngok tơchăr hơgei (AI), tơrĕk păng pơih să tơdrong pơm jang tơ̆ Việt Nam. Jah vă akhan tơdrong tơbôl Việt Nam - Nhật Bản tŏk bŏk ah jăl hơtŏk tơ-iung 'lơ̆ng rŏ hloh, lui ngeh gah chĭnh trĭ kơjung hloh. Nhật Bản kăp gĭt tơgŭm Việt Nam gah lơ tơdrong kiơ̆ tơdrong pơma đam 2 păh păng lơ teh đak. 'Măng năm tơmang Nhật Bản đơ̆ng Tổng Bí thư, Kơdră teh đak bơ̆n Tô Lâm đei lăng jing gô hơtŏk pơm hơdah kiơ̆ dôm tơchơ̆t đei kơdră kơ 2 teh đak hlôi pơkăp jing tơdrong jang hơdoi lơ̆m lơ tơdrong jang. Kiơ̆ đơ̆ng noh, 'măng năm tơmang gô tơgop kăp gĭt lơ̆m tơdrong pơm kiơ̆ dôm tơchơ̆t hơtŏk tơ-iung kơ rim teh đak, kŭm nhen tơdrong rơngei hiôk hian, jang hơdoi păng hơtŏk tơ-iung tơ̆ tơring păng lơ̆m apŭng plenh teh.