Hơnih vei lăng kon pơlei dêh char Lâm Đồng pơgơ̆r hăm rim hơnih jang păng jơnŭm pơgơ̆r 124 xah, phương, tơring tơm Phú Quý hơnơ̆ng hơlen kơjăp dôm tơdrong tơroi gah 'mi kial đak hơbông; tơtom tơroi truh kon pơlei kơchăng tang găn, vei sơđơ̆ng gah kon bơngai păng mŭk drăm. Khul juăt jang akŏm hơlen tơ̆ dôm tơring oei xa tơjih đak dơsĭ, đak krong, tơring klŭng păng dôm tơring hơnơ̆ng ƀơm đak lơ̆p, teh hơlih.

Jơnŭm pơgơ̆r jang tang găn răm kơ dêh char akŏm khul jang hơlen măng năr hloi, pơtoi tơdrong tơroi tơbăt gah 'mi kial kiơ̆ Tổng đài 112; hơmet tôm khul jang, tơmam drăm kiơ̆ pơkăp “4 tơ̆ tơring”, kơchăng tơgŭm dŏng sar bar mưh ƀôh đei tơdrong.

Tơ̆ hơnăp hơmơt kơ ‘mi tih, Anih vei lăng kon pơlei dêh char Đăk Lăk tơlĕch ăn Hla ar kăl kơsô̆ 6, athei rim anih jang, tơring kơchăng tơlĕch dôm trong jang tang găn hăm ‘mi tih đak lip păng teh hơlih. Dêh char athei rim tơring dăr hơlen dôm hơnih thŭng tơ ter đak krong, thong đak, hơnih đei hơmơt teh hơlih vă kơchăng yông tơklăh kon pơlei.

Rim khŭl linh ƀô̆ đô̆i, kŏng an hơmet ăn tôm bơngai jang, gre dŏng tơgŭm, dŏng sar bar; pơgơ̆r răp găn tơ̆ dôm pơnơ̆t blai jrŭ, hơdrin tôch ai ưh kơ lê̆ bơngai păng gre năm vih vơ̆t hơnih krê hơmơt. Kơdră chĕp kơ̆l dêh char Đắk Lắk athei rim tơ ‘ngla dơnâu mong đak, hnam kơmăy đak pơm tơlĕch unh hơyuh bơ̆jang kiơ̆ tơpăt trong vei lăng, pơchoh đak, vei sơđơ̆ng dơnâu mong đak păng tơring tơ̆ pơbăh. Khŭl kơdră xăh păng dôm anih jang ƀơm truh kơchăng trong jang tơgŭm, tơmam sa păng kon jên vă tơgŭm kon pơlei mưh athei tơklăh, yông hăt hot yua đơ̆ng ‘mi kial pơrăm.