Khul kơdră tơring jei proh hơmet ăn hơnih oei sa, pơtruh ăn dôm tơmam drăm yoa kăl, klăh asong khul jang vei lăng năng tông mŭk drăm, ưh kơ lê̆ kon pơlei vih hơlơ̆k năm oei tơ̆ bro hơmơt tơt mưh ‘mi kial hơbŭt hơbông tim mă prăng. Kiơ̆ kơ ‘noh, rim tơring kăl yông năm oei tơ̆ nai đei: kông Một, kông Bà Hỏa, Xóm Đăng, Xóm Đò păng bro Hải Minh.

Vă kon pơlei sơđơ̆ng jơhngơ̆m kơ ‘nơp kơ ‘mi kial hơbut hơbông, khul kơdră tơring hlôi proh hơmet hơnih oei, proh hơmet tơmam drăm sa, đak nhă, khăn păng dôm tơmam drăm yoa kăl anai. Tơ̆ hơnăp tơdrong 'mi tih rŏ năng oei pơm ăn hơmơt tơt hloh dơ̆ng, phường Quy Nhơn pơma hơdrô̆, dêh char Gia Lai pơma atŭm, hơnơng vei kơjăp gak vei lăng prăt măng prăt năr, dăr lăng hơlen ‘mi kial, vei lăng kơjăp rim bro hli hlơt.