Kơsơ̆ brei (19/8), Phŏ Kơdră Quốc hội Vũ Hồng Thanh kŭm hăm Khul jang đơ̆ng Anih vei lăng mŭk drăm păng jên hu kơ Quốc hội bơ̆ jang dăr lăng dôm tơdrong jang gĭt kăl kơ teh đak păng mŭk drăm, tơpôl kơ dêh char Lâm Đồng. Kiơ̆ nơ̆r tơroi đơ̆ng Anih vei lăng kon pơlei dêh char Lâm Đồng, tơ̆ dêh char đei tơdrong jang pơm Trong gre kơdâu hrĕnh Bắc - Nam găh Pơmât, jăl trong Gia Nghĩa - Chơn Thành, kơjung hlŏh 124km, akŏm đĭ đăng jên jang hlŏh 25.500 ti, đei Quốc hội kĭ ăn trong tơmât jên jang đơ̆ng hơtuch khei 6/2024, mă lei oei bơ̆ jang hiơ̆ hyĭn. Trong gre 27C kơjung hlŏh 119km tơƀưh dêh char Lâm Đồng hăm dêh char Khánh Hoà, đei trong krang Khánh Lê kơjung hlŏh 30km, jĭ anih tơhlăk găn trong atŏk tơiung chă tơmang lăng, chơ chuĕn tơmam tơ̆ tơring.

Đơ̆ng rŏng kơ pơm hơdăh dôm tơdrong tơhlăk, chih hơdăh tơdrong adrin yak hlŏh pơmat tat đơ̆ng dêh char Lâm Đồng, dôm bơngai jang lơ̆m Khul dăr lăng kơ Anih vei lăng mŭk drăm păng jên hu Quốc hội tơchĕng ‘lơ̆ng đon kơchăng, bơ̆ jang pran kơtang đơ̆ng dôm kơdră chĕp kơ̆l lơ̆m tơdrong pơgơ̆r bơ̆jang; chih hơdăh 1,2 tơdrong ưh kơlăp, kăl đei hơmet ming. Phŏ Kơdră Quốc hội Vũ Hồng Thanh tơtă, dêh char Lâm Đồng athei hơtŏk tơdrong jang ming man dôm tơdrong jang kăl; vang jang hơdoi hăm dôm anih tơmât jên jang, sek tơlang ‘lơ̆ng dôm tơdrong pơmat tat, tơhlăk tăk vă pơjing jơhngâm pran ăn tơdrong jang tŏk kiơ̆ đơ̆ng dôm tơdrong jang kăl ‘nâu./.