Tơ̆ jơ hơmet hơdrol, Phŏ Kơdră Quốc hội Đỗ Văn Chiến păng dôm bơngai tang măt hlôi hơmet tôm pơđĭ tơdrong jang păng hơlen lăng ‘lơ̆ng dôm tơdrong pơgơ̆r tơ̆ Lêh tơbăt. Đơ̆ng rŏng mơ̆ng nơ̆r tơgop găh tơdrong jang đơ̆ng dôm bơngai tang măt, Phŏ Kơdră Quốc hội Đỗ Văn Chiến chih iŏk dôm anih jang kơpal, anih jang hlôi hơtŏk jơhngơ̆m đon jang tơnăp, hơdrin, kơchăng pơgơ̆r tơdrong hơmet ăn pơyua ăn pơgơ̆r Lêh tơbăt 1 trong ‘lơ̆ng hloh.

Phŏ Kơdră Quốc hội kŭm lăng ƀôh kơtă hơnih păng kơtă ăn tơgop nơ̆r pơgơ̆r hăm dôm anih jang găh tơdrong jang pơgơ̆r, lêh sơng tơmoi, sơng bơngai tang măt, hla ar chih ăn tơdrong jang pơm Lêh tơbăt, pơrŏ hơmet ‘lơ̆ng, vei sơđơ̆ng hiôk. Kiơ̆ trong tơlĕch jang, Lêh tơbăt 80 sơnăm Năr pôk rơih mă blŭng pôk Quốc hội Việt Nam gô đei pơgơ̆r tih lơ̆m ‘năr dơning (6/1/2026) tơ̆ Hơnih hop akŏm tơm Diên Hồng, Hnam Quốc hội, Radiô nơ̆r pơma Việt Nam gô pơih pơdăh kơtă Lêh tơbăt tih âu.