Phŏ Thủ tướng Hồ Quốc Dũng ‘nao hơlen lăng yan âu păng bơ̆jang hăm Anih vei lăng kon pơlei dêh char Gia Lai găh tơdrong tơlĕch “Tơdrong jang Quang Trung” tơgŭm kon pơlei hơmet pơ ‘lơ̆ng hiong răm đơ̆ng ‘mi kial đak lơ̆p pơrăm, sơđơ̆ng tơdrong hơrih sa. Bơ̆jang kiơ̆ tơdrong jang, dêh char Gia Lai hlôi hơvơn hloh 1.200 ‘nu kang ƀô̆, ƀô̆ đô̆i păng 650 kang ƀô̆, kŏng an kơtă vang jang tơgŭm man, pơm hơmet hnam oei ăn Kon pơlei. Truh dang ei, pơđĭ hloh 27.500 tŏ hnam kăl kơ pơm hơmet ming đĭ pơm đang; lơ̆m kơsô̆ 674 tŏ hnam man ‘nao, hloh 96% đĭ pơm đang, dôm hnam uơ oei dơ̆ng tŏk bŏk đei hơtŏk hrĕnh ming man, hơdrin pơm đang hơdrol kơ ‘năr 15/1/2026 kiơ̆ athei đơ̆ng Thủ tướng Teh đak.

Phŏ Thủ tướng lăng ‘lơ̆ng jơhngơ̆m đon jang tơnăp, tơdrong mơ̆t jang kơtang đơ̆ng dêh char Gia Lai lơ̆m tơdrong bơ̆jang kiơ̆ “Tơdrong jang Quang Trung”, kŭm hăm tơdrong tơgŭm đei yua đơ̆ng ƀô̆ đô̆i, kŏng an. Phŏ thủ tướng athei tơring hơnơ̆ng dăr hơlen rim ŭnh hnam kon pơlei vă tơtom hơmet pơ ‘lơ̆ng tơdrong oei đei, vei sơđơ̆ng kon pơlei sơng Tết Nguyên đán Bính Ngọ ‘lơ̆ng hiôk păng tơlĕch dôm trong jang vei lăng sơđơ̆ng tơdrong hơrih sa đunh đai.