Kơsơ̆ năr 12/1, Khul pơm jang kơ Jơnŭm pơgơ̆r teh đak kơyuơ Phŏ Thủ tướng Hồ Quốc Dũng pơm Kơdră khul hlôi truh hơpong ngôi hăm kon pơlei tơ̆ tơring đak hơbông tơ̆ xah Hòa Thịnh păng pơm jang hăm Hơnih jang vei lăng kon pơlei dêh char Đăk Lăk vă hơlen, pơgơ̆r “Tơdrong jang Quang Trung” ming hơmet hnam oei ăn dôm unh hnam ƀơm răm đơ̆ng rŏng kơ 'mi kial.

Phŏ Thủ tướng truh pơma dơnuh, hơlêm minh ƀar unh hnam ƀơm răm kơtang lơ̆m 'măng 'mi kial đak hơbông ah hơtuch sơnăm 2025 ou ki, sô̆ hơ-iă hăm kon pơlei hlôi đei hnam 'nao, đei hơnih oei xa sơđơ̆ng. Kiơ̆ chih tơroi, truh năr 12/1, Đăk Lăk hlôi ming hơmet đang 892 tŏ hnam hư răm; lơ̆m 606 tŏ hnam man 'nao, hlôi keh đang 529 tŏ, đei jơnei hloh 87%, kơsô̆ oei nai noh tŏk bŏk oei đei ming hơmet.