Kơsơ̆  brei (11/5), Hop akŏm hlôi hop akŏm hơmet ăn, pơma dơnuh rơih ăn Khŭl Kơdră păng khŭl Thư ký kơ Hop akŏm; pơdrơ̆ng kiơ̆ tơdrong jang, trong tơchơ̆t bơ̆jang đơ̆ng hop akŏm. Tơ̆ jơ bơ̆jang, bơngai tang măt hlôi mơ̆ng Hla ar chih roi tơbăt hơlen lăng tơdrong jang đơ̆ng Anih jang Trung ương, Khŭl Kơdră păng Khŭl chĕp kơ̆l pơgơ̆r Anih jang Trung ương MTTQ Việt Nam jăl jang 2024 - 2026. Roi tơbăt hơdăh, jăl jang 2024 - 2026, Anih jang, Khŭl kơdră, Khŭl chĕp kơ̆l pơgơ̆r hơnơ̆ng tơplih ‘nao tơdrong jang, trong bơ̆jang, jang đang tơtom, ‘lơ̆ng, đei yua dôm hơnăp jang hlôi đei băt hơdăh lơ̆m tơdrong tơchơ̆t Hop akŏm păng dôm tơdrong tơlĕch ăn lơ̆m yan âu.

Kiơ̆ tơdrong jang, pơgê ‘nâu 12/5, Hop akŏm pơgơ̆r ‘măng pơih blŭng hăm tơdrong vang akŏm dôm Kơdră chĕp kơ̆l, sơ̆ pơm Kơdră chĕp kơ̆l Đảng, teh đak, MTTQ Việt Nam. Tơ̆ kơsơ̆, dôm bơngai tang măt pơma dơnuh păng pơdrơ̆ng kiơ̆ Tơdrong jang rơih bơngai jang Anih jang Trung ương MTTQ Việt Nam jăl XI, jăl jang 2026 - 2031; Pơma dơnuh rơih ăn Anih jang Trung ương MTTQ Việt Nam jăl XI, jăl jang 2026 - 2031; Hop akŏm Anih jang Trung ương MTTQ Việt Nam ‘măng mă mônh jăl XI, jăl jang 2026 - 2031.