Lơ̆m 5 sơnăm kơ ou, Tơdrong jang hlôi đei tơlĕch jang tôm dêh char, pơlei tơm; hlôi pơih hloh 300 rơbou lăm pơhrăm, tơroi tơbăt gah rơgoh 'lơ̆ng tơmam drăm xa; hơvơn hloh 8,5 triu unh hnam păng hơnih jang rah rai kĭ pơkăp pơm tơlĕch, tĕch pơdro tơmam choh pơtăm ka hơdang 'lơ̆ng rơgoh. Tơdrong jang adoi tơgŭm dôm jĭt rơbou tơdrong choh jang xa kiơ̆ pơkăp VietGAP, jang hưuh kơ, choh jang sơđơ̆ng 'lơ̆ng; đei jê̆ 9 rơbou tơmam drăm OCOP; kơ rơbou hơp tak xah, hơnih jang hơdoi đei tơgŭm pơjing 'nao dah mă hơmet hơtŏk kơjă tơmam drăm păng tơdrong tơgar hăm tơmam choh pơtăm tĕch lơ̆m teh đak păng tĕch ăn teh đak đe.

Pơtôch hop akŏm, Phŏ Thủ tướng Lê Thành Long ră hơdah, khei năr truh kăl tơplih kơtang đơ̆ng tơroi tơbăt jing pơtho pơm jang; tơplih trong kơ bơngai jang, mă kăl noh tơ̆ unh hnam jang rah rai; hơtŏk kơtang tơdrong jang rơgoh 'lơ̆ng, tơguăt hăm tơplih kơmăi kơsô̆ păng tơplih gơh hơgei. Rim jăl jang vei sơđơ̆ng tơdrong tơgŭm vă kon pơlei pơkăp truh tơdrong pơtôch lê̆ trong pơm jang, tĕch pơdro tơmam drăm ưh đei 'lơ̆ng sơđơ̆ng, vei lăng tơnăp jơhngơ̆m jăn tơpôl păng hơtŏk choh jang xa kơjăp sơđơ̆ng.