Kơmăng năr 25/12 tơ̆ Hà Nội pơgơ̆r Tơdrong akŏm “Hồ Chí Minh – Tơdrong hơpơi 'meh 2025” hăm hơnăn “Việt Nam pơdrŏng jơnap”, pôk hơpah hăm hơnih jang, bơngai jang rơgei kơ jơ̆p teh đak lơ̆m tơdrong hŏk pơhrăm păng pơm kiơ̆ đon bơnôh trong jang 'lơ̆ng Hồ Chí Minh. Lơ̆m 90 pơnĭt, tơdrong akŏm tơbang hơdah tơdrong tơroi 'lơ̆ng gah tơdrong plang, sơnong tơnăp, gơh hơgei kơyuơ tơpôl, kiơ̆ đơ̆ng noh pơlan să tơdrong 'lơ̆ng, pơjing jơhngơ̆m pran ăn tơdrong jang pơlong 'mêm kơ teh đak.

Truh akŏm păng iung pơma, Tổng Bí thư Tô Lâm sơkơ̆t hơdah, hăm tơdrong pơgơ̆r đơ̆ng Đảng, tơdrong jang kăch mang pơkăp jơnŭm pơgơ̆r jang chĭnh trĭ kiơ̆ pơkăp bot 'lơ̆ng, pơm jang đei jơnei, tơnăp pơtoi đei hơtŏk kơtang, pơkăp truh pơjing jơnŭm pơgơ̆r tơguăt hăm kon pơlei, pơm jang yuơ kơ kon pơlei; pơm jang đei jơnei dôm pơkăp tơgŭm hơtŏk mŭk drăm – tơpôl, vei lăng 'lơ̆ng tơdrong hơrih ăn kon pơlei.