Lơ̆m Tong hơnê̆ sơnăm kơ âu, unh hnam ƀok Lê Huy Dũng, tơ̆ thĭ trâ̆n Lộc Thắng, apŭng Bảo Lâm, dêh char Lâm Đồng pă đei hnam oei xa bơih. 5 ‘nu lơ̆m unh hnam 3 hnưr bơngai chơng băl năm thuê hnam dăng oei, tơdrong hơrih tơnap tap dêh. Tơdrong tơm kơlih hnam kơ unh hnam hlôi hư răm noh pơih lê̆. Lơ̆m kơplah dôm hla bar kăl vă pơm hnam ‘nao noh jơnŭm pơgơ̆r tơring ưh đei asong kơlih tôm hơgăt teh kơ unh hnam ƀok oei lơ̆m hơnih pơkăp krăi tơmo kăp gĭt. Ƀok Lê Huy Dũng tơroi: “Pơtruh nơ̆r hăm Jơnŭm pơgơ̆r teh đak pơm hơdu ƀiơ̆ gah hla bar pơkăp, dah mă hơmet dah mă tơplih lê̆ vă kon pơlei gơh đei tơdrong hơrih sơđơ̆ng. Tơpă đei teh ră mă lei ưh đei hnam oei, ưh đei hnam oei noh nhôn ưh kơ băt vă pơm thoi yơ ôh, hăp tơnap tap hrat hrĭn dêh”.

Unh hnam yă Phạm Thị Năm, tơ̆ phương Lộc Tiến, pơlei tơm Bảo Lộc, dêh char Lâm Đồng adoi nhen noh mơ̆n. Hnam oei, teh choh jang kơ unh hnam tŏk bŏk oei pơm jang sơđơ̆ng, trŏ tơchơ̆t, lơ̆m tơring oei xa kơ kon pơlei thoi noh mă ƀơm “tơhlăk”, ưh gơh asong ăn kơ đe kon dah mă pơkơ̆ng tŏk iŏk jên đơ̆ng anih mong jên vă pơm jang. Yă Phạm Thị Năm ăn tơbăt: “Phương Lộc Tiến nhôn âu đei dôm unh hnam lơ kon hơ-ioh, hơrih hơtŭm 3-4 hnưr bơngai mă lei ưh đei klah asong ăn kon hơ-ioh oei pha. Lơ unh hnam ‘meh jang mŭk drăm, ‘meh tŏk iŏk jên đơ̆ng anih mong jên adoi ưh gơh kơlih tơhlăk ah anih Pơkăp. Mă kăl noh dang ei lơ unh hnam kon pơlei hlôi hư răm mă lei ‘meh ming hơmet adoi ưh gơh mơ̆n”.

Kiơ̆ Tơchơ̆t 866 năr 18/7/2023 đơ̆ng Thủ tướng teh đak gah tơdrong kĭ tơchơ̆t Pơkăp hơlen, sir kôch păng iŏk yua dôm kơluăi tơmo kăp gĭt đơ̆ng sơnăm 2021-2030, sơkơ̆t truh sơnăm 2050, tơ̆ dêh char Lâm Đồng đei hloh 70.000ha ƀơm pơkăp pơsuơ̆k pơsuơ̆l lơ̆m tơring kon pơlei oei xa, pơrăm truh tơdrong hơrih kơ rơbăn unh hnam kon pơlei hăm jê̆ 100.000 măt bơngai. Kiơ̆ kơ ƀok Võ Ngọc Hiệp, Phŏ Kơdră Anih jang vei lăng kon pơlei dêh char Lâm Đồng, tơdrong pơkăp krăi tơmo kăp gĭt tơsŭl tơsăl lơ̆m tơring kon pơlei oei xa, ưh hơdrô̆ pơrăm truh tơdrong hơrih kon pơlei mă oei pơm ăn tơdrong pơkăp hơtŏk mŭk drăm – tơpôl kơ dêh char jing tơhlăk tơhlĭn: “Vă vei sơđơ̆ng tơdrong hơtŏk tơ-iung kơjăp noh athei hơlen pơklaih rim tơdrong tơnap tap lơ̆m tơdrong tơsŭl tơsăl gah pơkăp hơlen, iŏk yua tơmo kăp gĭt. Tôm hloh 50% hơgăt teh tơ̆ apŭng Bảo Lâm, minh pah kơ Bảo Lộc adoi tơ̆ tơring tơm, đang kơ noh dôm tơdrong asong jang, lơ tơring hơtŏk jang adoi oei lơ̆m tơring pơkăp iŏk yua tơmo kăp gĭt. Dang ei tôm tơdrong jang adoi pơdơh, jô̆ hloi hăm tơdrong pơjing tơring kon pơlei oei ‘nao”.

Ƀôh hơdah tơdrong ưh kơ trŏ đơ̆ng Pơkăp krăi tơmo kăp gĭt kiơ̆ Tơchơ̆t 866, lơ̆m ‘măng năm pơm jang ah hơtuch khei 8/2024 tơ̆ dêh char Lâm Đồng, Thủ tướng teh đak bơ̆n Phạm Minh Chính hlôi pơgơ̆r Anih tơm jang gah Mŭk drăm păng Cham char tenh kuăng hơlen păng chă trong pơklaih. Thủ tướng teh đak bơ̆n Phạm Minh Chính ră hơdah: “ ‘Nâu jing tơdrong tơhlak gah luơ̆t, kơyuơ noh Anih tơm jang gah Mŭk drăm Cham char athei akŏm, tơbang vă hơmet gah Luơ̆t Mŭk drăm Tơmo kăp gĭt, mă kăl noh dôm tơdrong ưh đei tơguăt hăm tơdrong hơrih tơ̆ tơring mă hơdrol ki hlôi jang. Dang ei tam mă iŏk yua tơmo kăp gĭt noh athei asong kon pơlei yua teh tơ̆ tơring tơmo kăp gĭt vă pơm hnam, choh jang, hơrih xa, layơ sir yua tơmo kăp gĭt noh hơlen đơ̆ng rŏng. Tơ̆ âu, hơnơ̆ng kơ pơkăp krăi tơmo kăp gĭt đang kơ noh chiu lôch đĕch, thoi noh kon pơlei hơrih hăm yă kiơ? Noh jing dôm tơdrong ưh kơ trŏ hăm tơdrong hơrih tơpă”.

Hăm tơdrong pơgơ̆r đơ̆ng Thủ tướng teh đak, kon pơlei dêh char Lâm Đồng tŏk bŏk oei gơnơm lơ̆m dôm anih jang kơpal đei tơrĕk dah tenh kuăng pơklaih tơnap tap tơhlăk tơhlĭn lơ̆m pơkăp krăi tơmo kăp gĭt vă dah sơđơ̆ng tơdrong hơrih, tơdrong hơtŏk jang mŭk drăm ăn tơpôl.