Dôm năr ‘nâu, yak tơ̆ lơ trong tơ̆ An Nhơn Bắc, ‘nŏh hơnơ̆ng ƀôh kon pơlei oei hăt rong, hơmet bơ̆n pơkao, kăt hơleh hla ‘long mai. ‘Nâu jĭ tơdrong jang tôch gĭt kăl, vă pơm ăn ‘long mai lĕch pơkao păng tĕch đei kơjă ƀlep ƀât Têt. ‘Nhŏng Ngô Văn Hào, tơ̆ Kueng kơ phô̆ Trung Lý, phường An Nhơn Bắc, bơngai đei hlŏh 15 sơnăm pơtăm ‘long mai, tơroi, unh hnam ‘nhŏng dang ei đei hlŏh 3.000 tơnơm ‘long mai lơ kơloăi, mă lơ ‘nŏh ‘long mai giáng long, mai gep păng mai bonsai.

“Khei ‘năr âu rim unh hnam jang pơgar hơmet ming ‘long, rơih dôm tơm ‘long ‘lơ̆ng vă vei rong, ‘long yơ ưh ‘lơ̆ng ‘nŏh ming lê̆, gô sơnăm đơ̆ng rŏng tĕch dơ̆ng, dang ei kon pơlei oei chơ chuĕn lơ ‘long mai năm tơ̆ kơchơ, ming tĕch jŭm dăr Anih vei lăng kon pơlei phường hlôi đei pơm hơmet hơdrol vă tĕch ăn kơ đe. Rim unh hnam jang pơgar oei răt hơmet kơchŏu ăn ‘long mai păng rong pơ ‘lơ̆ng, kon pơlei oei bơ̆ jang tôch pơneh”.

Mât hơdai hăm tơdrong rong hơmet, ‘nhŏng Ngô Minh Trí, tơ̆ Kueng kơphô̆ Trung Lý, phường An Nhơn Bắc, đei dang 2000 tơm ‘long mai tih iĕ, tơchĕng adrol vă hơnhăk tĕch dang 600 tơnơm ƀât Têt âu. ‘Nhŏng ăn tơbăt, đơ̆ng rŏng kơ đak lơ̆p, tơdrong vei rong ‘long mai athei hŭt lơ kŏng ƀiơ̆, mă lei gơnơm đơ̆ng ‘năr tŏ ‘lơ̆ng, ‘long blŭh hơlơ̆k tôch pran. Kiơ̆ ‘nhŏng Trí, dôm sơnăm tơjê̆ âu, tơdrong ‘mĕh răt ngôi ‘long mai bonsai roi đei lơ bơngai, kơlih yoa sư iĕ, ‘lơ̆ng, ming pơrŏ tôch hơiă.

“Dang ei, oei rong hơmet ‘long, pleh lê̆ hla ưh ‘lơ̆ng, jên tĕch đơ̆ng 500.000 hlak truh kơ triu 1 tơnơm. Bon sai ‘mĭn pơdŭ ƀônh kơna đe ming ƀât kơƀang bơ̆ jang tôch hơiă, ‘long mai đei lơ kơloăi mă lei hrei ‘nâu bonsai đe ‘mĕh răt lơ hlŏh. Bơ̆n pơm sư đơ̆ng ‘long mai giáng long mă ưh ‘nŏh mai kơđeh hơ ‘yui, kăt hơmet, rong pơrŏ hiong dang 2,3 sơnăm jing đei ‘long mai bonsai”.

Kơplăh ‘nŏh, hăm lơ bơngai pơtăm ‘long pơkao đunh sơnăm, tơdrong tơplih ming kiơ̆ đe ‘mĕh vă kŭm jing tơdrong tôch kơ tơtăm. Ƀok Lê Văn Tuấn, tơ̆ phường An Nhơn Bắc, bơngai đei hloh 40 sơnăm pơtăm ‘long mai, dang ei đei dang 500 tơm ‘long mai giáng long, lơ̆m noh đei lơ tơm ‘long rong đunh truh dôm jĭt sơnăm.

“Mai hơnhăk tĕch hrei ‘nâu lơ kơloăi ƀiơ̆, sơ̆ ưh gan măh đei lơ dơng sơdrai pơrŏ, lăp pơm pơrŏ thoi prao đĕch. Sơ̆ ưh đei tơmam vă tĕch dang ei đei tôch lơ, tĕch pơmat ƀiơ̆. ‘Long Mai inh pơtăm 20 sơnăm đei, 30 sơnăm kum đei, iĕ hlŏh lơ̆m pơgar kŭm 6 sơnăm bơih, dang ei vă tơplih ưh kơ gơ̆h, inh kră bơih athei pơtăm pơm 1 tơm ‘long bonsai ưh kơsĭ đei dei dei hloi ôh”.

Phường An Nhơn Bắc, dêh char Gia Lai đei pơjing kiơ̆ đơ̆ng tơmât hơdai dôm phường, xăh kơ thĭ xăh An Nhơn, dêh char Bình Định so, dang ei găh dêh char Gia Lai. ‘Nâu kŭm đei năng jĭ tơring pơtăm ‘long mai tih păng đei ư hơnhang tơ̆ tơring Tŏk bŏk, hăm hlŏh 450 unh hnam, teh pơtăm xă hlŏh 145 ha, hơnhăk ba iŏk yoa hlŏh 100 ti 1 sơnăm.

‘Mi kial kơsô̆ 13 (khei 11/2025) đei hloi ‘mi tih đak lơ̆p pơm hiong răm lơ ăn tơring pơtăm ‘long mai tơm kơ dêh char Gia Lai, lơ̆m noh đei phường An Nhơn Bắc. Đak tih lơ̆p lơ pơgar ‘long mai, lê̆ lăi lơ tơm ‘long teh trôk ngăl, rơh vă ôm đĭ, dơng hla hơngreu hơngrônh. Mă lei, lăp đơ̆ng rŏng kơ đak hrơ̆, bơngai pơtăm ‘long mai tơ̆ âu hlôi bơ̆ jang hloi, rong ming dơ̆ng. Rim pơgar ‘long mai đei choh hơmet teh, kăt hŭt dơng hư, vei rong dơ̆ng rơh. Lơ tơm ‘long mai ngĕh vă lôch bơih jing arih ‘lơng dơ̆ng, lĕch rơnôp pơkao tih tih, vă tơlang ƀât Pơyan Puih mak truh, hơnhăk ba lơ tơdrong hơmĕng kơ 1 pơyan Têt phĭ tơtŏ dơnŏ ‘lơ̆ng.

Ƀok Đinh Thanh Trình, Pho Kơdră vei lăng kon pơlei phường An Nhơn Bắc, tơroi, ‘mi kial đak lơ̆p sơnăm âu ki, pơm ăn dang 120.000 tơm ‘long mai hư, hiong răm pơhlom hlŏh 80 ti hlak jên. Tơ hơnăp tơdrong ‘nŏh, khul kơdră pơgơ̆r tơring tơlĕch lơ trong tơgŭm ăn kon pơlei tơiung ming dơ̆ng tơdrong jang xa.

“Vă pơjing tơdrong ‘lơ̆ng ăn kon pơlei jang xa păng tĕch ‘long mai ƀât Têt anih jang kơpal bơ̆ jang lơ trong tơgŭm lơ̆m noh, ưh đei iŏk jên thuê̆ anih ming tĕch, tơƀôh trong ăn gre đơ̆ng dôm dêh char găh Pơbăh – găh Kơtu truh răt ‘long, pơm hiôk hian ăn tơmoi truh răt ‘long mai đơ̆ng phường. Atŭm hăm ‘nŏh đei lơ tơdrong tơgŭm, roi tơƀôh ăn anih jang kơpal, anih mong jên lê̆ tam mă iŏk jên hre, mă ưh ‘nŏh asong tŏk iŏk jên hăm jên kon tŏ sĕt vă kon pơlei gơ̆h đei jên jang xa dơng”.

Tŏk bŏk dôm pơgar ‘long mai oei vă mât lơ̆m pơyan tĕch, jơva đe kăt hơmet dơng sơdrai, pruih đak hơdai hăm ‘năr rŏ tŏ hơlăng tơ̆ kơsơ̆ pơm ăn um rup đe hăt bơ̆ jang roi hơiă hlŏh dơ̆ng, hăm ƀĕnh tơdrong hơmĕng ‘nao. Hăm bơngai pơtăm ‘long mai An Nhơn Bắc, pơyan mai Tết Bính Ngọ 2026 ưh lăp pơyan tĕch mơdro đĕch, mă oei jing tơdrong tơƀôh hơdăh đon adrin ưh pơdơ̆h, khŏm yak hlŏh pơmat tat đơ̆ng tŏ ‘mi kial kơnê̆, vă rim pơkao mai gơ̆h tơlang trŏ năr, hơnhăk ba 1 Pơyan Puih mak ‘nao hăm ƀĕnh tơdrong hơmĕng./.