Đei pơgơ̆r truh năr 25/1, Hop akŏm đei hơnăn: “Hăm hla kơ nuih mơng kơ Đảng, atŭm jơhngơ̆m, minh đon pơm jang đei jơnei dôm tơchơ̆t tơlĕch hơtŏk tơ-iung teh đak truh sơnăm 2030; kơchăng tơlĕch trong jang, lui ngeh yak pran lơ̆m anglŏ sơnăm hơtŏk tơ-iung kơ teh đak, kơyuơ tơdrong rơngei hiôk hian, pơdrŏng pran kơtang, jơnap hơnŭk hơnua, yak tŏk chủ nghĩa xã hội”.

Hop akŏm mă 14 gô pơma đam, hơlen dôm hla bar chih tơbang kăp gĭt: Chih tơbang Chinh trĭ kơ Ƀan châ̆p hanh Trung ương jăl 13; Chih akŏm tơbang minh ƀar tơdrong kăl păng pơm jang tơplih 'nao kiơ̆ pơkăp xah hô̆i chu nghia lơ̆m 40 sơnăm kơ ou tơ̆ Việt Nam; Chih tơbang pơtôch 15 sơnăm pơm kiơ̆ Tơchơ̆t Đảng păng pơtơm chih hơmet dơ̆ng kơ Tơchơ̆t Đảng; Chih tơbang hơlen lăng tơdrong pơgơ̆r jang đơ̆ng Ƀan châ̆p hanh Trung ương Đảng jăl 13.

Hla bar chih tơbang lơ̆m Hop akŏm mă 14 hlôi akŏm đei tơdrong pơdrơ̆ng đơ̆ng Đảng păng đon bơnôh kon pơlei, ah đei hloh 14 triu nơ̆r tơgop đơ̆ng kang ƀô̆, đảng viên, bơngai hŏk kơjung, bơngai juăt jang păng tôm kon pơlei lơ̆m păng 'nguaih kơ teh đak.

Hop akŏm bơngai tang măt jơ̆p teh đak 'măng mă 14 kơ Đảng jĭ gru kơnăl kăp gĭt kơ đon lui păng tơdrong hơpơi đei, jơhngơ̆m pran păng tơdrong drơ̆ng lăp đơ̆ng kon pơlei, hơ-'nhăk teh đak lui ngeh tŏk kơtang lơ̆m chăl sơnăm 'nao: rơngei hiôk hian, pơgơ̆r kơdih, pơdrŏng pran kơtang, jơnap hơnŭk hơnua.