Mĭnh giĕng adrol kơ Noel, pơpiơ̆k lơ̆m năr đei ‘mi tih, tơ̆ cham hnam khop Mằng Lăng, kon pơlei kiơ̆ khop ƀă yang oei puih hơmet, pơm hang đá, pơrŏ ‘long hơngo Noel hăm lơ tơmam tôch hơiă. Ƀok Nguyễn Thành Toán, oei tơ̆ plei Ngân Sơn ăn tơbăt: “Sơnăm ‘nâu pơm ưh đei tôm nhen dôm sơnăm sơ̆ yoa đei hiong răm lơ đơ̆ng ‘mi kial kơna hơmet hơmăy hnam khop lơ lou đĕch. Kŭm đei đăi ‘long hơngo Noel, unh đeng sơnglŏng, đang kơ ‘nŏh rup nge Giê su, Mĕ Maria, ƀok Giu sê. Tơ̆ Hnam, inh pơm hang đá iĕ ƀât cham ‘năi.”

Hăm lơ unh hnam, athei hiong lơ khei ‘năr ‘mơ̆i mă gơ̆h hơmet ming đang tơdrong hiong răm tôch dêh âu ki, mă lei truh năr Noel âu, dôm unh hnam hlôi hơmet đei bơih tơdrong hơđơ̆ng blŭng a. Ƀok Nguyễn Văn Sen, tơ̆ plei Hội Tín tơroi, unh hnam ƀok đak hoch pơđĭ tơmam, kon tơrong păng ƀa hơƀo. Mă lei đei đon lui kơjăp, pơlei pơla vang tơgŭm băl, khul kơdră vang tơgŭm ăn hai, Pơyan Noel âu oei tôch hơiă đĕch: “Mă đơ̆ng thoi noh ră, mă lei pơyan Noel âu oei tôch hơiă, ƀĕnh jơhngâm đon ‘mêm băl hơnhăk ba lơ nơ̆r pơlung, tơdrong hiôk chơt ăn tơpôl. Hơpơi ‘mĕh đĭ đăng rim bơngai roi ‘mêm băl, vă gơh yak hlŏh rim tơdrong pơmat tat.”

Hơdai hăm tơdrong ‘nŏh, ‘nhŏng Phan Văn Truyền, tơ̆ plei Hội Tín, tơroi, nơ̆r krao khan tih hlŏh đơ̆ng ‘nhŏng păng kon pơlei sơnăm ‘nâu ‘nŏh jĭ apinh tơdrong hiôk hian. Đơ̆ng rŏng lơ tơdrong pơm tơtŏ jơhngâm yoa đơ̆ng tŏ ‘mi kial kơnê̆, bu bu kŭm hơpơi 'mĕh jăh đei tơdrong arih xa hiôk sơđơ̆ng thoi adrol ki dơ̆ng: “Đak lơ̆p pơm hiong răm tôch dêh găh mŭk drăm, jơhngâm đon. Pơyan Noel âu ưh jor rim bơngai vă krao khan mă mônh ‘nŏh apinh đei tơdrong hiôk hian, đơ̆ng rŏng jĭ thơ thou ăn rim bơngai jăh đei dơ̆ng tơdrong arih xa sơđơ̆ng ‘lơ̆ng nhen adrol ki”

Kiơ̆ Ƀok soi Phêrô Võ Thanh Nhàn, Ƀok soi vei lăng tơring khop Mằng Lăng, lơ̆m tơring khop đei 527 unh hnam hăm dang 1.560 ‘nu kon khop, oei xa tơ̆ dôm xăh Tuy An Đông, Tuy An Bắc păng 1 păh tơ̆ Tuy An Tây. ‘Măng đak tih lơ̆p âu ki pơm ăn vă rim unh hnam pŭ răm. Yoa thoi noh, ƀât Noel sơnăm ‘nâu rim hnam hơmet pơrŏ lăp ai đĕch, vă akŏm jơhngâm tơgŭm băl. Tơring khop adrin krao hơvơn dôm khul jang tơgŭm truh tơgŭm ăn kon pơlei kiơ̆ khop vă pơm sơđơ̆ng dơ̆ng tơdrong arih xa.

Ƀok soi Phêrô Võ Thanh Nhàn pơma: “Noel sơnăm ‘nâu jĭ noel mă bơ̆n ƀôh, mă đơ̆ng bơ̆n oei tơƀâp lơ pơmat tat yoa đơ̆ng ‘mi kial hơbŭt ră mă lei đe sư oei hơnơ̆ng tơgŭm băl yak hlŏh pơmat tat. Pơma kiơ̆ tơdrong lui, nhôn ƀôh rim tơdrong nol ‘nŏh đei năr tôch ngăl, tơdăh bơ̆n đei đon lui kơjăp ‘nŏh gô yak hlŏh rim tơdrong nol lơ̆m tơdrong arih xa.”

Jơva teng neng hnam khop Mằng Lăng păr ang ƀât tơring tơrang Đắk Lắk ‘nao yak hlŏh ‘mi kial đak lơ̆p. Pơyan Noel tơ̆ Mằng Lăng sơnăm ‘nâu ưh đei ƀrŭng ƀrăng unh pơchrang, ưh đei chơt hơiă nhen thoi rim sơnăm, mă lei đei ƀĕnh tơdrong ‘lơ̆ng lơ̆m jơhngâm đon. ‘Nŏh jĭ pơyan Noel đơ̆ng đon băt ‘mơ ‘met, đơ̆ng jơhngâm đon ‘mêm bơngai, đơ̆ng đon lui đei tưk tơiung kơplăh oei tơƀâp pơmat tat, vă đơ̆ng noh, kon pơlei kiơ̆ khop kŭm hăm băl iung jang, vang năm truh tơdrong arih xa hiôk sơđơ̆ng, ‘lơ̆ng rŏ tơ̆ hơnăp kơnh.