Tơ̆ plei Kon Tun, xăh Tu Mơ Rông, dêh char Quảng Ngãi, ƀok A Hai (50 sơnăm) jĭ bơngai năm hơdrol lơ̆m tơdrong tơplih ‘nao trong jang xa vă atŏk tơiung mŭk drăm unh hnam. Dang ei unh hnam ƀok vei lăng dang 20 ha teh, lơ̆m noh hlŏh 10 ha ‘long bri pơtăm, mă lơ ‘nŏh ‘long Gáo vàng. Hơdai hăm ‘nŏh, ƀok pơtăm hơlam dơ̆ng ‘long tơƀăr, ‘long hông, ‘long xà cừ păng rong rơmo tơ̆ hơla yơ̆p ‘long, kiơ̆ đơ̆ng noh hơnhăk ba iŏk yoa kơjăp.

Ưh lăp jang mŭk drăm rơgei đĕch, ƀok A Hai oei adrin krao hơvơn kon pơlei tơplih ming đon tơchĕng găh trong jang xa, tơplih đơ̆ng pơtăm ƀum hơƀo jing pơtăm ‘long bri hơdai hăm vei lăng ‘lơ̆ng cham char: “Inh adrin jang vă atŏk tơiung mŭk drăm. Mưh ba jang đei bơih ‘nŏh kon hơ ‘lơ̆p jang kiơ̆. Đảng viên athei jang mă tơnăp, athei năm hơdrol lơ̆m tơdrong jang xa. Tơ̆ âu, inh chă krao hơvơn mih ma duch nă akŏm jơhngâm choh jang xa, jet gia pơma nuh, tơroi ăn băl trong jang xa đei iŏk yoa lơ”.

Kŭm tơ̆ xăh Tu Mơ Rông mơ̆n, mŏ Y Khương (36 sơnăm), Bơngai pơgơ̆r pơlei pơm hloi Bí thư Chi ƀô̆ plei Ngọc Leng jĭ 1 lơ̆m dôm kăn ƀô̆ tơring jang rơgei mưh chă krao hơvơn kon pơlei tơplih ming ‘long pơtăm, dar dĕh pơm hơtŏk iŏk yoa, pơm hơtŏk tơdrong tơdrong arih xa. Đơ̆ng sơnăm 2024, mŏ Y Khương pơtơm pơtăm cheh phe dang 6 sao. Đĭ đăng tơđăh cheh phe đei xăh tơgŭm ăn, kăn ƀô̆ đơ̆ng Anih choh jang xa jur pơtho tơƀôh ki thuơ̆t jang đơ̆ng sir sơlŭng, tuh mơ̆r truh vei rong. Đơ̆ng rŏng 1 sơnăm, ‘long cheh phe blŭh jing ‘lơ̆ng.

Mŏ Y Khương tơchĕng, jĭ đảng viên ba athei jang mă tơnăp, năm hơdrol lơ̆m tơdrong jang mŭk drăm vă kon pơlei hŏk kiơ̆: “Roi tơbăt, krao hơvơn kon pơlei tơplih ming đon tơchĕng, trong jang xa. ‘Long cheh phe đei iŏk yoa lơ, kon pơlei ƀôh đei yoa kơna vang jang kiơ̆. Adrol ki pơtăm ƀum mă lei ƀum lôch đĭ. Đơ̆ng sơnăm 2024, inh krao hơvơn kon pơlei pơtăm cheh phe. Sơnăm 2024, plei Ngọc Leng đei 24 unh hnam vang jang; truh sơnăm 2025 đei dơ̆ng 25 unh hnam pơtăm, iŏk yoa đơ̆ng cheh phe lơ ƀiơ̆ kơna mih ma duch nă adrin pơtăm sư”.

Đơ̆ng dôm trong jang mŭk drăm rơđăh ‘lơ̆ng tơ̆ tơring, đon hơnhăk tơdrong Tơdrong tơchơ̆t mât lơ̆m tơdrong arih xa tơ̆ xăh Tu Mơ Rông dar deh đei jang kiơ̆. Tơring chih hơdăh trong jang atŏk tơiung mŭk drăm jĭ tơdrong jang tơm, tơklep kơjăp hăm tơdrong jang tơm tơjur tơnuh hin kơjăp ‘lơ̆ng păng pơjing tơring tơrang ‘nao.

Lơ̆m jăl jang đơ̆ng 2025 - 2030, xăh Tu Mơ Rông đei đon pơhnŏng pơm hơtŏk iŏk yoa jô̆ păh lăp kiơ̆ kơ̆l bơngai tŏ sĕt hlŏh ‘nŏh 63 triu hlak jên 1 sơnăm. Vă jang đei tơdrong ‘nâu, xăh iŏk tơdrong choh jang xa pơm tơdrong jang tơm, lơ̆m noh ‘long cheh phe đei năng jĭ ‘long pơtăm gĭt kăl hlŏh. Lơ̆m 2 sơnăm blŭng jăl jang, xăh adrin pơtăm dang 300 ha ‘long cheh phe, dar deh pơjing tơring pơtăm tơmam 1 ƀôt.

Ƀok Võ Trung Mạnh, Bí thư Đảng xăh Tu Mơ Rông, dêh char Quảng Ngãi ăn tơbăt, tơ̆ tơring oei tơlĕch trong pơjing kơsô̆ tơring pơtăm păng chih pơjing hơnăn cheh phe Tu Mơ Rông, vă pơm lăp hăm tơdrong hơgăt tĕch mơdro tơ̆ teh đak đe: “Mĭnh lơ̆m 6 tơdrong jang tơm, tŏk pran đơ̆ng xăh ‘nŏh khŏm pơm tơplih ming đon tơchĕng, trong jang xa, pơtơm đơ̆ng kăn ƀô̆, đảng viên. Kăn ƀô̆, đảng viên ưh jô̆ tơ̆ Anih chĕp kơ̆l Đảng, Anih Mặt trận Tổ quốc Việt Nam xăh dăh mă Anih vei lăng kon pơlei xăh Tu Mơ Rông athei vang bơ̆ jang mă pran ‘lơ̆ng, đơ̆ng pơgar ơng, pơtho trong jang truh dăr hơlen, pơlung bơ̆ jang. Hơlen năng tơ̆ âu ‘nŏh jĭ vang jang hơdoi, vang hơlen năng, ưh kơsĭ gô jang đang ‘mơ̆i na năm hơlen năng”.

Dôm tơdrong jang đei păng trong jang đơ̆ng tơring tơ̆ Tu Mơ Rông jĭ tơdrong tơƀôh hơdăh jơhngâm đon jang tôch tơnăp hơnhăk tơdrong tơchơ̆t đơ̆ng Hop akŏm Đảng ƀô̆ dêh char Quảng Ngãi ‘măng mă I, jăl jang đơ̆ng 2025 – 2030 lơ̆m tơdrong arih xa. Dôm tơring hơnơng tơmât tơdrong jang mŭk drăm hơdai hăm pơm hơtŏk tơdrong arih xa ăn kon pơlei, iŏk kon pơlei pơm tơm vă chơng hơnhăk Quảng Ngãi jang tŏk pran, kơjăp lơ̆m chăl ‘nao.

Anih chĕp kơ̆l Đảng dêh char Quảng Ngãi chih hơdăh tơdrong bơ̆ jang, pơtho tơƀôh, roi tơbăt jĭ tơdrong jang tơm, tơlĕch jang kiơ̆ tơdrong tơchơ̆t hrơ̆ch ‘lơ̆ng đơ̆ng dêh char truh tơ̆ tơring. Ƀok Hồ Văn Niên, Bí thư Đảng dêh char Quảng Ngãi athei rim anih chĕp kơ̆l đảng, khul kơdră tơring jăh pơjing trong jang mă hơdăh tơklep hăm hơnăp jang đơ̆ng bơngai chĕp kơ̆l: “Hơtŏk hrĕnh tơdrong jang kiơ̆ dôm tơdrong tơm, pơjing jơhngâm pran, jang tŏk mŭk drăm tơpôl. Hơlen năng dôm tơdrong jang bơ̆ jang đunh ưh jăh kĕh vă akŏm jơhngâm hơmet pơ ‘lơ̆ng pơmat tat, tơhlăk tăk, hơtŏk hrĕnh tơdrong jang ming man, sek tơlang kiơ̆ tơdrong tơchơ̆t, veh ver pơhuach kư̆ kă”.