Akŏp măt bơngai tơmoi năm tơmang pơhiơ̆ đei truh 5 triu 200.000 ‘nu bơngai, lơ hloh mĭnh poăt pơtêng hăm khei năr ou sơnăm sơ̆. Lơ̆m mă ou, tơmoi teh đak đe đei vă jê̆ 100.000 ‘nu, lơ hloh 3 ‘măng. Akŏp jang sa iŏk đei dang 3.700 ti hlak jên, tŏk vă jê̆ 2,5 ‘măng pơtêng hăm sơnăm 2024. Lơ hơnih truh lơ̆m dêh char hơvơn đei lơ tơmoi năm tơmang lăng. Mă kăl ‘noh Hơnih tơmang pơhiơ̆ cham char Măng Đen, rim pơlei tơmang pơhiơ̆ pơlei pơla păh Pơmơ̆t păng rim hơnih tơmang pơhiơ̆ đak dơsĭ, achon păh Hơlĕch ‘noh đei Lý Sơn, Sa Huỳnh, Mỹ Khê.

Tơdrong atŏk kơtang kơ tơmang pơhiơ̆ Quảng Ngãi iŏk đei đơ̆ng tơdrong pơih să hơnih lăp đơ̆ng rŏng proh hơmet, tơgŭm ăn tơgoăt iung jang hơdoi jơnei hloh ƀar păh tơring đak dơsĭ achon dơsĭ păh Hơlĕch hăm tơring cham char bri brăh, pơlei pơla păh Pơmơ̆t, pơjing đei rim hơyuh, hơnih tơmang pơhiơ̆ tôm tĕch. Mă kăl, kon pơlei hlôi iung jang pơvih pơvăn, vei kơjăp ‘nhĕm ‘nhot joăt joe sơ̆ ki, kơ̆m kang kơnang giĕng păng tơdrong jang joăt joe sơ̆ ki, minh păh tơgop lơ̆m vei răk tơƀăk mong tơdrong oei sa joăt joe, mĭnh păh pơm hơtŏk jang sa iŏk đei, hơmet pơ ‘lơ̆ng ăn tơdrong hơrih sa hiôk jơnap.