Quảng Ngãi đei tơdrong pran ‘lơ̆ng hơtŏk tơiung pơgang hla ‘long, cheh phe, ‘long, tơ̆r păng ka hơdang. Mă lei, pơm tơlĕch oei răh rai, jang hơdai đơ̆ng kon pơlei păng anih mơdro sa tam mă kơjăp, tơdrong gơh pơm tơlĕch oei tam mă gan ‘lơ̆ng. Yua thoi noh, jăl jang 2026–2030, dêh char chă trong pơgơ̆r dơ̆ng pơm tơlĕch, pơjing kơjă, hơtŏk ‘lơ̆ng tơmam păng pơih să anih tĕch mơdro. Pơma tơ̆ hop akŏm, ƀok Võ Văn Hưng, Phŏ Kơdră Anih tơm vei lăng găh Choh jang sa păng Cham char athei dêh char Quảng Ngãi akŏm hơtŏk tơiung mŭk drăm bri lơ kơjă kăp gĭt tơklep hăm pơgang hla ‘long, choh jang sa ‘lơ̆ng tơklep hăm pơm tơlĕch păng mŭk drăm ka hơdang ‘nao. Ƀok Võ Văn Hưng akhan, hăm pơgang hla ‘long, dêh char Quảng Ngãi kăl kơ pơjing kơjă vei lăng gen, hơtŏk tơiung hơdrĕch truh pơm tơlĕch jrŭ păng pơjing hơnăn:

“Ưh kơ gơh lăp pơih să teh bri, pơtăm dăh mă tĕch tơmam hmă. Tơdrong hơgăt ‘noh jĭ hơtŏk tơiung kơmăy kơmŏk pơgang hla ‘long, pơm đei dôm tơmam đei kơsô̆ khoa hŏk lơ, đei hơnăn ‘lơ̆ng păng kơjă mŭk drăm tih”.

Mĭnh lơ̆m dôm tơdrong tơhlăk đei anih mơdro sa tơroi tơ̆ hop akŏm ‘noh jĭ ưh kơ măh tơdrong tơmam akŏm. Ƀok Phan Văn Hồng, Kơdră vei lăng Mir đak lar pơm tơlĕch, Kŏng ti pơm tơlĕch tơmam đơ̆ng choh jang sa đei Sao Mai tơbăt, sơnăm 2026, anih mơdro sa jang hơdai hăm dang 120 anih răt tơmam, hơp tak xăh păng unh hnam kon pơlei pơtăm hloh 581 héc ta gui yuăn păng chik. Kơsô̆ tơmam iŏk răt đei dang 22.000 tấn, ƀơ̆t mă ‘meh vă đơ̆ng hnam kơmăy dang 75.000 tấn rim sơnăm. Ƀok Phan Văn Hồng apĭnh dêh char Quảng Ngãi tơgŭm hơmet pơ ‘lơ̆ng tơdrong tơhlăk tơhlĭn găh teh, hơtŏk tơiung tơring tơmam, trong nơnăm păng asong mã kơsô̆ tơring pơtăm.

“Lăp đei teh, đei teh ‘mă đei tơring tơmam, mă gơh pơjing păng jang đei kơmăy kơmŏk ‘nao”.

Vang bơngơ̆t truh tơdrong ‘nâu, ƀok Nguyễn Trung Kiên, Phŏ Kơdră dơnơm kŏng ti Cheh phe Việt Nam athei, tơring tơgŭm dăr hơlen hla ar khôi luơ̆t găh teh, băt hơdăh hơdral tơring pơtăm, hơmet pơ ‘lơ̆ng tơdrong tơgar băl păng pơjing hla ar chih răk pơyua ăn tơchă băt anih pơm tơlĕch:

“Apĭnh Anih vei lăng kon pơlei dêh char Quảng Ngãi athei rim anih jang păng khŭl kơdră xăh jang hơdai roi tơbăt găh trong jang proh hơmet, tơdrong iŏk yua teh păng anih jang kăl. Kiơ̆ đơ̆ng noh, anih mơdro sa gơh hơlen lăng, băt hơdăh tơring tơmam trŏ lăp, veh ver tơdrong pơtăm ‘long hlom lơ̆m teh proh hơmet, vei sơđơ̆ng tơdrong gơh jang păng đei yua trŏ luơ̆t đơ̆ng bơngai iŏk yua teh”.

Tơ̆ tơdrong jang mŭk drăm đak dơsĭ, ƀok Trần Đình Luân, Kơdră Anih vei lăng găh Ka hơdang akhan, tơmam păng tơdrong jang pơm tơlĕch ka hơdang kơ Quảng Ngãi tam mă tơgăl hăm tơmam ‘lơ̆ng. Dêh char kăl kơ hơmet ming dơ̆ng khŭl duk, pơtrŭt tơplih tơdrong jang iŏk jang ưh kơ đei yua, hơtŏk ‘lơ̆ng vei lăng đơ̆ng rŏng kơ rôp yâu păng sơng đei anih mơdro sa tơmơ̆t jên jang pơm tơlĕch jrŭ. Hăm rong ka hơdang, kăl kơ băt hơdăh tơring rong đak dơsĭ, iŏk jang tơmam 180 dơnâu mong, hơdai hăm hơtŏk tơiung dôm tơmam ‘lơ̆ng tơklep hăm vei lăng tơdrong đei yua păng tơmang lăng cham char bri brăh. Ƀok Trần Đình Luân tơroi nơ̆r tơgop:

“‘Meh krao hơvơn anih mơdro sa lơ̆m rong ka hơdang lơ̆m đak dơsĭ ‘noh dêh char athei tơƀôh tôch kơ rơđăh hơnih âu gơh rong, hơnih âu hơtŏk tơiung đei ‘noh mă đei anih mơdro sa mơ̆t gơh. Đơ̆ng noh dui kiơ̆ găh tơdrong tơroi yŏng, rong, pơm tơlĕch”.

Ƀok Hồ Văn Niên, Bí thư Đảng dêh char Quảng Ngãi tơbăt, đơ̆ng rŏng kơ tơmơ̆t hơdai dêh char Quảng Ngãi păng dêh char Kon Tum, tơring đei hơnih hơtŏk tơiung ‘nao, akŏm tơdrong pran ‘lơ̆ng tơ ter đak dơsĭ tơring Tŏk bŏk păng bri kông Tây Nguyên. ‘Nâu jĭ tơdrong ‘lơ̆ng vă tơgoăt tơdrong pran găh choh jang sa, tơnŏk đak dơsĭ, ka hơdang, choh jang sa, pơgang hla ‘long păng bri ‘long kơjăp. Ƀok Hồ Văn Niên tơlĕch tơdrong:

“Tơdrong tơlĕch ăn ưh khan lăp hơtŏk dôm tơdrong kiơ đei đơ̆ng hơdrol, mă oei athei pơgơ̆r pơm tơlĕch, pơm hiôk jên jang, hơtŏk ‘lơ̆ng kơjă kăp gĭt tŏk păng vei sơđơ̆ng hơtŏk tơiung trŏ lăp đơ̆ng mŭk drăm, tơpôl hăm vei lăng tơmam drăm, cham char”.

Trĕng lăng truh sơnăm 2045, dêh char Quảng Ngãi yak truh hơtŏk tơiung choh jang sa ‘nao, jing hơnih tơm pơm tơlĕch pơgang hla ‘long, pơm tơlĕch ‘long, tơ̆r păng hơtŏk tơiung mŭk drăm đak dơsĭ lơ̆m tơdrong jang mŭk drăm rơgoh, mŭk drăm ‘lơ̆ng.