Tơ̆ hop akŏm, bơngai tang măt ăn dôm anih jang lơ̆m Radio vang pơma nuh pơm hơdăh hlŏh dơ̆ng dôm tơdrong hlôi jang đei, atŭm hăm ‘nŏh roi tơƀôh dôm tơdrong oei ưh hơiă păng tơlĕch trong hơmet ming, pơm ‘lơ̆ng ăn sơnăm 2026 gơ̆h jang kĕh ‘lơ̆ng rim tơdrong đei pơjao.

Chih răk, pôk pơ ư dôm tơdỏng adrin đơ̆ng dôm anih jang,  Bí thư Đảng, Kơdră chĕp kơ̆l Radio nơ̆r pơma VN Đỗ Tiến Sỹ pơma hơdăh: Tơ̆ hơnăp kơnh, dôm anih jang athei hơnơ̆ng mât 1 ƀơ̆r đon, hơnơ̆ng tơplih ‘nao tơdrong tơroi, chih tơroi kiơ̆ lơ trong, tơƀôh hơdăh hơnăp jang đơ̆ng anih chih hla ar tơroi tơm hơnơ̆ng yak hơdoi hăm teh đak.

Kơdră chĕp kơ̆l Radio nơ̆r pơma VN akhan: Sơnăm 2026 tơlĕch jang lơ tơdrong gĭt kăl nhen: Hop akŏm Đảng lơ̆m teh đak ‘măng mă XIV, tơlĕch jang kiơ̆ Tơdrong tơchơ̆t đơ̆ng Hop akŏm mă XIV, pơgơ̆r pôk rơih Quốc hội păng Jơnŭm pơgơ̆r kon pơlei jơ̆p tơring, kŭm hăm dôm tơdrong jang kăch mang đei tơlĕch tơ̆ jơ̆p tơring, đơ̆ng anih chĕp kơ̆l đảng, khul kơdră pơgơ̆r păng Jơnŭm pơgơ̆r kon pơlei tơ̆ tơring.