Tơ̆ jơ hop akŏm, Thủ tướng athei lơ̆m khei năr kơnh Hơnih tơm vei lăng Mơdro sa pơm keh đang hô sơ, tơroi tơbăt tơdrong pơtôch jang hơdoi găh tơmơ̆t jên jang ming man hnam kmăi ŭnh hơyuh hạt nhân Ninh Thuận 2 hăm rim pang jang hơdoi hơdrol kơ ‘noh păng iung jang pơma đam kiơ̆ trong “đei iŏk yoa hơdoi, đei tơdrong ou to vang tơgŭm djru dih băl” kiơ̆ ƀlep tơdrong tơchơ̆t kơ Khôi luơ̆t Tơdrong pơkăp apŭng plĕnh teh păng khôi luơ̆t đei ƀơm truh. ‘Ngoăih kơ ‘noh, iung jang hơdoi hăm rim hơnih tơm, hơnih bơ̆ jang ƀơm truh ‘moi kiơ̆ tơdrong gơh jang, drơ̆ng mĭnh nơ̆r vă pơma dơnuh, pơma đam hăm rim pang jang hơdoi găh jang hơdoi tơmơ̆t jên jang ming man hnam kmăi ŭnh hơyuh hạt nhân Ninh Thuận 1, tơtom tơroi tơbăt ăn kơdră kơpal rim tơdrong tơhlăk tơhlĭn đei ƀôh dơ̆ng. Thủ tướng pơjao ăn Hơnih tơm jang jên hu iung jang hơdoi hăm Hơnih vei lăng kon pơlei dêh char Khánh Hòa dăr lăng, tơlĕch nơ̆r apĭnh dơ̆ng tơmơ̆t jên jang Trung ương tơgŭm djru vă tơlĕch jang tơdrong vă jang yông kon pơlei, pơjing hơnih oei ‘nao ăn kon pơlei, iŏk tơvih teh ăn rim hnam kmăi ŭnh hơyuh hạt nhân Ninh Thuận. Adoi tĕnh koăng iung jang hơdoi hăm rim hơnih tơm, hơnih bơ̆ jang ƀơm truh, iung jang pơgơ̆r pơma đam găh tơdrong tơgŭm ăn tŏk iŏk jên ăn tơdrong vă jang pơm hnam kmăi ŭnh hơyuh Ninh Thuận 1, ŭnh hơyuh Ninh Thuận 2, sơđơ̆ng trŏ lăp hăm Tơdrong tơchơ̆t jang hơdoi tơmơ̆t jên jang tơ iung pơjing hnam kmăi vă kĭ tơchơ̆t ăn lơ̆m khei 3 kơnh.