Dơ̆ng hơdrol hlŏh 7 khul thi nai vă gơ̆h iŏk jơnei lơ̆m tơdrong thi pơm tơmam đơ̆ng râm rĕk nhuơ̆ yoa Đoàn xăh pơgơ̆r, tơmam Lakak Việt Nam đơ̆ng đoan plei Cuôr Dăng A tơƀôh hơdăh tơdrong rơngei. Đe đoàn viên chă iŏk “râm rĕk” vă pơm đei tơmam tôch đei yoa. Mŏ H’Tuyết Niê, Bí thư chi đoàn plei Cuôr Dăng A, xăh Cuôr Dăng, apŭng Cư Mgar tơroi: “Truh hăm tơdrong thi âu, chi đoàn plei nhôn hơnhăk Lakak Việt Nam đei pơm đơ̆ng dôm tơmam râm rĕk, chă dônh iŏk lơ̆m tơdrong arih xa rim năr nhen hla ar, đing et, đơ̆l kơchai păng dôm tơmam yoa nai. Tơmam âu ‘mĕh roi tơbăt găh jơhngâm đon ‘mêm kơ pơlei pơla, teh đak, kŭm nhen jơhngâm đon hưch hanh kơ hơdrĕch hơdrung, tơdrong pơm tơm, kơjăp ‘lơ̆ng teh đak. Đơ̆ng noh, kơdih kâu inh kŭm nhen jơhnơr mơlôh vă hơnơ̆ng adrin pơtâp, hŏk pơhrăm vă pơjing păng vei lăng teh đak kơjăp ‘lơ̆ng.”

Kŭm hăm dôm tơdrong thi, tơplŏng kơdâu, khei Druh dăm sơnăm ‘nâu tơ̆ Đắk Lắk đei lơ tơdrong jang akŏm đei lơ bơngai, lơ tơdrong jang tơgŭm yoa tơpôl. Hăm hơnăn “Druh dăm năm hơdrol, bơ̆ jang tơgŭm yoa tơdrong arih tơpôl”, lơ tơdrong jang đei pơgơ̆r chơt hơiă lơ̆m dêh char nhen Năr pơh rơgoh, năr bơ̆ jang tơgŭm tơm vă pơjing tơring kơdrâm rơgei, pơgơ̆r ăn lơ Khul jang tơplih hăm kơmăy sô̆ jur pơvih ăn tơpôl.

Kŭm hăm dôm tơdrong jang atŭm yoa đoàn kơpal tơlĕch, đoàn tơ̆ tơring kŭm bơ̆ jang lơ tơdrong jang tôch đei yoa, lăp hăm tơring tơrang, anih jang đơ̆ng kơdih. Mŏ H’Vinh Êban, Chi đoàn plei Kroa B, xăh Cuôr Đăng, apŭng Cư Mgar ăn tơbăt, vă jê̆ 300m trong hla kơ teh đak hlôi đei khul druh dăm pơm hơmet vă sơng dôm năr lêh tih lơ̆m khei 3. Kŭm hăm ‘nŏh, druh dăm kŭm adrin puih, hyum hơmet râm rĕk, vei rơgŏh cham char, chong pơ ‘ngoăih ‘ngĭet tơ̆ đak tơnglang Ea Mkang păng pơtăm ‘long tơ̆ 1,2 anih lơ̆m tơpôl.

“Inh kŭm hăm đe bôl boăl đoàn viên druh dăm năm bơ̆ jang pơm trong Hla Kơ kơ đe druh dăm, pơtăm pơkao păng pơgơ̆r kôch hơmet tu đak hơdrâm. Kiơ̆ đơ̆ng dôm tơdrong jang ‘nâu, inh ƀôh tôch hơiă yoa kơdih kâu vang tơgop jơhngâm ăn lơ tơdrong jang kơ đe druh dăm lơ̆m pơlei”.

Kiơ̆ ‘nhŏng Y Lê Pas Tơr, Phó Bí thư chĕp kơ̆l Đoan dêh char, Kơdră vei lăng Khul druh dăm Việt Nam dêh char Đắk Lắk, hlŏh 3 giĕng tơlĕch jang dôm tơdrong jang khei Druh dăm, đĭ đei vă jê̆ 220 khul jang tơgŭm, bơ̆ jang đei hlŏh 200 tơdrong jang tơ̆ lơ tơring kon pơlei oei xa. Vă jê̆ 160 khul Pơtho kơmăy sô̆ đei pơjing, vang tơgŭm roi tơƀôh trong iŏk yoa kơmăy sô̆ ăn kon pơlei. Druh dăm lơ̆m dêh char kŭm vang tơgop jên, năr jang man 25 tŏ hnam lơ̆m tơdrong jang sut pơđĭ hnam hiăh hiok.

Tơdrong ‘nao đơ̆ng khei druh dăm sơnăm ‘nâu ‘nŏh jĭ dôm tơdrong jang pơjei băl Vang sut pơđĭ hnam hiăh hiok; bơ̆ jang ‘lơ̆ng tơdrong Tơchơ̆t kơsô̆ 57-NQ/TW đơ̆ng Anih tơm Chinh trĭ găh atŏk tơiung khoa hŏk, kơmăy kơmŏk, tơplih ‘nao rơgei păng tơplih hăm kơmăy sô̆ kơ teh đak kiơ̆ đơ̆ng Tơdrong pơtho kơmăy sô̆. Đơ̆ng rŏng iŏk đei tơdrong jang, rim khul đoàn đei trong jang tôch rơđăh, bơ̆ jang kiơ̆ hloi đơ̆ng blŭng.

“Chih pơjing dôm tơdrong hơgăt kơdih ăn khei Druh dăm, ‘moi kiơ̆ tơdrong vă jang lơ̆m sơnăm kŭm nhen dôm tơdrong jang lơ̆m khei 3. Tơlĕch, klăih song dôm tơdrong hơgăt mă rơđăh ăn dôm apŭng, thĭ, plt păng đoàn găh nhôn, pơtho tơƀôh trong pơjing dôm khul jang rơgei, vă bơ̆ jang hrơ̆ch ‘lơ̆ng lơ̆m dêh char. Nhôn vă adrin tơmât yoa lơ hlŏh dơ̆ng kơmăy sô̆ lơ̆m tơdrong jang vă tơlĕch jang ‘lơ̆ng hlŏh, hrĕnh păng đei yoa hlŏh truh hăm đĭ đăng đoàn viên, drăh dăm”.

Khei druh dăm sơnăm 2025 tôch hăm lơ tơdrong jang tôch hơiă đơ̆ng druh dăm sơnăm mơlôh dôm hơdrĕch hơdrung Tây Nguyên – Jĭ jơhngâm đon jang tơnăp păng đon hơpơi ‘mĕh plang pơyơ̆r jơhngâm. Dôm tơdrong jang druh dăm, dôm tơdrong jang tơgŭm ưh lăp hơnhăk ba tơdrong đei yoa ‘lơ̆ng ăn tơpôl đĕch mă oei akŏm đei jơhngâm ‘mêm băt, čhôk ‘nă păng đon ‘mĕh pơjing pơlei pơla. Hơiă hlŏh dôm kơsô̆ đei chih dơ̆ng, ‘nŏh jĭ ƀơ̆r hiĕk, tơpang ti vang tơgŭm băl păng plei nuih tôch tơnăp ‘lơ̆ng.

Trong jang pơvih pơvăn đơ̆ng druh dăm sơnăm mơlôh ưh lăp dơ̆ng lơ̆m khei Druh dăm đĕch mă gô păr ang lơ̆m rim tơdrong jang iĕ rim năr dơ̆ng, vang tơgop pơm ăn Tây Nguyên roi đunh roi tŏk pran, pơdrŏng, ‘lơ̆ng rŏ.