Kiơ̆ đơ̆ng rim kang ƀô̆, đang viên păng Kon pơlei oei tơ̆ Tây Nguyên - Tơring tơmăn Nam Trung bộ, tơdrong kăl hloh đơ̆ng rŏng Hop akŏm tih mă XIV kơ Đảng ‘noh tơdrong pơgơ̆r tơlĕch tơdrong tơchơ̆t kăl tĕnh koăng, kơtang păng trŏ lăp hăm yan ou. ‘Nhŏng Bùi Viết Tiệm, tô 7, tơring Chư Sê, dêh char Gia Lai akhan, rim trong tơlĕch jang tih lăp đei yak mơ̆t lơ̆m tơdrong hơrih mưh đei tơlĕch jang kiơ̆ dôm tơdrong jang mă kon pơlei ƀôh hơdăh:“Rim kang ƀô̆, hơnih jang kăl tĕnh koăng dăr lăng, hơmet ming dôm tơdrong tơchơ̆t oei hơgrop dih băl, oei găn ga tơdrong atŏk tơ iung; adoi pơjing dôm nơ̆r pơtho tơbăt hơdăh vă tơring tơlĕch jang kiơ̆ ‘lơ̆ng hloh. Rim tơring kăl tơlĕch jang ‘lơ̆ng dôm tơdrong tơchơ̆t hăm dôm tơdrong jang mă kon pơlei ƀôh kơmăt băt kơđon hloi. Đơ̆ng hơmet pơ ‘lơ̆ng tơdrong jang hla bơar, pơm hơtŏk bơ̆ jang ‘lơ̆ng, truh pơjing tơdrong hơrih sa kơjăp ‘lơ̆ng, pơm hơtŏk jang sa iok yoa kơjăp.”

Kiơ̆ trong lăng đơ̆ng tơpôl hơnih mơdro sa, yă Nguyễn Thị Diễm Kiều, mĭnh hơnih mơdro sa tơ̆ tơring Đak Đoa, dêh char Gia Lai pơma tơbăt jơhngơ̆m đon hơmŏ đơ̆ng rŏng Hop akŏm tih mă XIV kơ Đảng, rim tơring gô đei dôm trong jang tơgŭm djru tơpă hloh dơ̆ng ăn hơnih mơdro sa, mă kăl lơ̆m jang kiơ̆ khoa hŏk-kmăi kmŏk păng tơplih kơsô̆:“Ĭnh hơmŏ ‘noh đơ̆ng rŏng Hop akŏm tih noh dêh char gô đei dôm trong jang tơgŭm djru truh hăm hơnih mơdro sa, mă kăl ‘noh jang kiơ̆ khoa hok kmăi kmŏk, đei dôm trong tơgŭm djru tơmơ̆t jên jang găh kmăi kmŏk, tơgŭm djru pơtho pơhrăm ăn khul jang, kmăi kmŏk kơsô̆. Jei hơmŏ akhan ‘noh teh đak gô tơgŭm djru dơ̆ng ăn hơnih mơdro sa gơh răt yoa tơmam drăm mơdro sa điên tư ‘lơ̆ng vă veh ver dôm hơnih mơdro sa jang đĭ ai mă lei ưh kơ kĕ pơjei hăm dôm tơmam drăm re, tơmam drăm pơm thơ thoi ou to.”

Tơ̆ rim tơring hơtăih yăih, tơring kon kông, hơpơi ‘meh vă tih tên hloh đơ̆ng rŏng Hop akom tih mă XIV kơ Đảng ‘noh tơdrong lăng ba tơpă, ƀlep hăm tơdrong yan ou hloh dơ̆ng. Ƀok Hmên, kon pơlei Bahnar oei lơ̆m pơlei Tuơh Ktu, tơring Đak Đoa, dêh char Gia Lai:“Ĭnh lui tơpă truh ou kơnh Đảng Teh đak hơnơ̆ng lăng ba, hơnơ̆ng chĕp pơgơ̆r Teh đak atŏk tơ iung, kon pơlei mĭnh jơhngơ̆m đon lui yom, tơgŭm djru. Đảng đei dôm trong tơlĕch jang trŏ lăp vă teh đak roi năr roi atok tơ iung kơjăp hloh dơ̆ng”.”

Kiơ̆ kơ yă H’ Hương B.Krông, hơdrung Ê Đê oei lơ̆m phương Ea Kao, dêh char Dak Lăk, Hop akom tih mă XIV kơ Đảng tơlĕch ăn, khul kang ƀô̆ tơpă tơklep tơjê̆ hăm kon pơlei, hlôh vao kon pơlei, mơ̆ng kon pơlei păng tơtom xek tơlang dôm tơdrong đơ̆ng tơring hloi. “Hơmŏ ăn hăm rim bơngai vang mơ̆t lơ̆m rim kơdră chĕp pơgơ̆r gô iung jang ‘lơ̆ng hloh dơ̆ng, tơnăp hloh dơ̆ng lơ̆m tơdrong hơlen băt hơdăh tơdrong, mơ̆ng păng jang kiơ̆ ‘lơ̆ng sơđơ̆ng ăn tơdrong đei iŏk yoa, jơhngơ̆m đon hơpơi ‘meh vă trŏ lăp đơ̆ng kon pơlei”.

Kiơ̆ đơ̆ng ƀok Võ Chí Vương, Kơdră chĕp pơgơ̆r Sở Nội vụ dêh char Khánh Hòa, vă trŏ lăp hăm trong lăng, tơdrong hơpơi ‘meh vă tih tên đơ̆ng Hop akom tih mă XIV kơ Đảng, tơdrong bơ̆ jang kơ khul kang ƀô̆ kăl hơnơ̆ng atŏk kơtang jang ‘lơ̆ng hloh dơ̆ng. Jang ‘lơ̆ng keh đang tơdrong bơ̆ jang păng trŏ lăp hăm jơhngơ̆m đon hơpơi ‘meh vă đơ̆ng kon pơlei păng hơnih mơdro sa gô jing trong pơkăp gĭt kăl hloh vă hơlen tơdrong bơ̆ jang ‘lơ̆ng lơ liơ kơ khul kơdră chĕp pơgơ̆r.“Găh bơ̆ jang kang ƀô̆ lơ̆m chăl hle, rim trong tơlĕch jang tơm ‘noh: hơnơ̆ng pơm hơtŏk bơ̆ jang ‘lơ̆ng khul kang ƀô̆ tơklep hăm proh hơmet, pơm kơtoei khul kơdră chĕp pơgơ̆r, sơđơ̆ng ăn jang kiơ̆ ‘lơ̆ng, jơnei; tơplih ‘nao kơtang hloh dơ̆ng lơ̆m bơ̆ jang tơmơ̆t jang, pơjao tơdrong jang; adoi lăng kơjăp pơtho pơhrăm ming kang ƀô̆, trŏ lăp hăm tơdrong jang lơ̆m chăl hle.”

Đơ̆ng tơdrong ƀôh yan ou tơ̆ Tây Nguyên - Tơring tơmăn Nam Trung bộ rŏ năng đei ƀôh, tơdrong hơmŏ kơtang hloh đơ̆ng rŏng Hop akom tih mă XIV kơ Đảng ưh khan lăp trong pơchoh ăn tơdrong jang kăl, mă oei tơlech jang kiơ̆ hơdăh păng jơnei lơ̆m iung jang kiơ̆. Mưh trong tơlĕch iung jang đơ̆ng Khul kơdră Teh đak, rim hơnih tơm, hơnih jang păng tơring đei tơlĕch jang hrơ̆p minh ‘măng, iung jang kơtang păng lăng kon pơlei, hơnih mơdro sa ‘noh kăl hloh, trong tơlĕch jang đơ̆ng Hop akom tih mă XIV gô tơpă lang să păng mơ̆t lơ̆m tơdrong hơrih, pơjing đei jơhngơ̆m pran ăn teh đak atŏk tơ iung lơ̆m jăl ‘nao.