Đơ̆ng rŏng 40 sơnăm tơplih ‘nao, dôm jơnei tih tên, tôch gĭt kăl hăm chăl sơnăm găh atŏk tơ iung mŭk drăm - tơpôl, vei kơjăp sơđơ̆ng chinh trĭ, sơđơ̆ng teh đak-sơđơ̆ng dơ̆ng kơjăp tơpôl păng vang mơ̆t hơdoi apŭng plĕnh teh kơtang hlôi pơjing đei hơyak pran kơjăp iăp kơtang, pơm hơtŏk loi dơ̆ng jơhngơ̆m đon lui yom kơtang đơ̆ng Kon pơlei hăm Đảng. Lơ̆m yan ou tơ̆ Tây Nguyên ‘noh tơƀôh hơdăh ăn trong jang trŏ lăp ou. Kon pơlei tơring kon kông hơmŏ hăm jơnei kơ Hop akom tih ‘măng mă 14, dôm trong tơlĕch jang gĭt kăl tih tên gô đei tơlĕch jang kiơ̆ tĕnh koăng. ‘Nhŏng Y Sắc Ly Arul, oei lơ̆m phương Buôn Ma Thuột, dêh char Dak Lăk tơbăt jơhngơ̆m đon hơpơi ‘meh vă, rim tơdrong tơchơ̆t kăl đơ̆ng Đảng gô hrôih đei tơlĕch jang kiơ̆ hơdăh, pơjing đei hơyak kăl hloh lơ̆m atŏk tơ iung mŭk drăm-tơpôl, mă kăl ‘noh hăm tơring kon kông.“Ĭnh hơpơi ‘meh vă Đảng păng Teh đak hơnơ̆ng lăng ba kơtang hloh dơ̆ng truh hăm kon kông, lơ̆m ou đei kon pơlei Êđê nhôn; lăng ba truh tơdrong vei răk tơƀăk mong tơdrong oei sa ‘lơ̆ng rŏ joăt joe sơ̆ ki,  tơklep kơjăp hăm atŏk tơ iung tơmang pơhiơ̆, vă tơdrong hơrih sa kơ kon pơlei roi năr roi đei sơđơ̆ng dơ̆ng kơjăp hloh dơ̆ng.”

Lơ̆m dôm sơnăm ou ki, tơdrong lăng ba đơ̆ng Đảng păng teh đak ‘moi kiơ̆ rim trong tơlĕch jang trŏ lăp pơjing đei tơplih kơtang lơ̆m tơdrong hơrih sa kơ kon pơlei kon kông. Đơ̆ng trong nơnăm, hnam trương pơtho pơhrăm, jang pơgang truh tơgŭm djru choh jang sa, tơjur dơnuh kơjăp ‘lơ̆ng, vei răk tơƀăk mong tơdrong oei sa joăt joe ‘lơ̆ng rŏ sơ̆ ki…, lơ trong bơ̆ jang hlôi mơ̆t lơ̆m tơdrong hơrih sa, hơnhăk đei jơnei hơ iă, đei kon pơlei lăp đon, tơgŭm djru. Lơ̆m jơ ‘năr chơt hơ iă ‘nă hal jơnei keh kong Hop akŏm ‘măng mă 14 kơ Đảng, ƀok Hmên, kon pơlei oei lơ̆m pơlei Tuơh Ktu, tơring Đak Đoa, dêh char Gia Lai tơbăt:“Ba ƀôh hơ iă dêh, tôch lăp đon kơ yuơ khul kơdră Teh đak ling lang lăng ba kơjăp hơnhăk dôm tơdrong tơchơ̆t kăl, mă kăl ‘noh trong tơchơ̆t tơgum djru ‘măn ăn tơring kon kông, hlôi tơgŭm ăn tôm tơdrong ăn kon pơlei nhôn. Ĭnh lui: truh ou kơnh Đảng, Teh đak hơnơ̆ng lăng ba, hơnơ̆ng chĕp pơgơ̆r teh đak atok tơ iung, kon pơlei mĭnh nơ̆r ƀơ̆r đon tơgŭm djru. Đảng gô đei dôm tơdrong tơchơ̆t trŏ lăp vă teh đak roi năr roi atŏk tơ iung kơjăp iăp kơtang hloh dơ̆ng”.

Đơ̆ng lơ̆m tơdrong hơrih sa yan ou, kang ƀô̆, đang viên păng Kon pơlei rim dêh char Tây Nguyên - Nam Trung bộ lui kơjăp Đảng hơnơ̆ng pơm pơkeh dôm tơdrong tơchơ̆t vei lăng năng tông kon kông kiơ̆ trong jang kiơ̆ dôm tơdrong đei kơdih, lăng kon pơlei jĭ tơdrong kăl hloh lơ̆m atŏk tơ iung, đơ̆ng atŏk tơ iung tơmang pơhiơ̆ pơlei pơla truh atŏk kơtang tơmơ̆t jên jang ming man trong hnam, sơđơ̆ng hơrih sa, jang sa kơjăp tơ̆ hơnăp tơplih tŏ ‘mi kial. Yă Rơ Châm H’Yéo, sơ̆ jang lơ̆m Khul kơdră chĕp pơgơ̆r Đảng dêh char, Kơdră so chĕp pơgơ̆r Hơnih jang Mặt trận Tổ quốc Việt Nam dêh char Gia Lai sơkơ̆t hơdăh, jơhngơm đon lui lơ̆m Đảng hlôi đei tơgoăt kơjăp hơmet pơ ‘lơ̆ng đơ̆ng rim jơhnơr păng dang ei hơnơ̆ng iung jang kiơ̆ kơjăp:“Kon pơlei Tây Nguyên ling lang mĭnh nơ̆r ƀơ̆r đon kiơ̆ Đảng, kiơ̆ Ƀok Hô. Hơpơi ăn Đảng bơ̆n hơnơ̆ng lăng ba, pơjing rơvơn ăn Tây Nguyên hơnơ̆ng atŏk tơ iung mŭk drăm, oei sa joh ayŏ, pơtho pơhrăm, hăm trong tơ iung pơjing Tây Nguyên pơdrŏng găh muk drăm, đei lơ bơngai gơh hơgei.