Lơ̆m hlŏh 1 ha teh mir kơ unh hnam ƀok Nguyễn Trung Đông, tơ̆ plei Chư Ty 4, xăh Đức Cơ, dêh char Gia Lai, lơ anih teh hơđang ƀât tŏk bŏk pơgar cheh phe. Lơ anih teh đĭ hlŭn, dui ba hloi tơm ‘long cheh phe. Ƀok Đông jô̆ pơhlom đei truh kơhrĕng tơm ‘long cheh phe hiong răm. Ƀok tôch pơngơ̆t yoa teh hơđang âu đĭ đei đơ̆ng dôm sơnăm adrol ki bơih, mă lei sơnăm ‘nâu roi dêh, roi xă đơ̆ng rŏng dôm ‘măng ‘mi tih. Kŭm hăm pơgar ‘long ƀok Đông, oei đei hloi mir pơgar kơ 2 unh hnam nai lơ̆m pơlei đei teh hơđang ‘năi, akŏm đĭ đăng teh hơđang vă hlŭn kơjung truh 1,5km.

"Hơđang jrŭ dang ei ƀât tŏk bŏk pơgar đĭ truh 1 met 2 bơih, tam mă băt vă hơmet thoi yơ. Vă truh pơyan phĕ bơih mă lei mât lơ̆m pơgar tôch hli, ưh pơ̆n mât. Teh hơđang oei tơvŏk hăm rơh cheh phe, ba tơchĕng ‘nŏh huei krê mơ̆n mă lei mưh yak ‘nŏh phiuh teh hlŭn. Tơ̆ hơla nhen teh hlŭn đĭ bơih, pă pơ̆n mât lơ̆m pơgar cheh phe bơih."

Kiơ̆ tơdrong hơlen năng đơ̆ng Anih vei lăng kon pơlei xăh Đức Cơ ăn ƀôh, anih teh hơđang tơ̆ plei Chư Ty 4 pơm ăn teh hlŭn 1, 2 ƀôt bơih păng tôch hơmơt hơlih, ƀơm ưh ‘lơ̆ng truh lơ ha teh choh jang xa kơ 3 unh hnam. Anih vei lăng kon pơlei xăh chĕng hơmet tơring krê hơmơt, tơtă ăn kon pơlei, mă loi jĭ đe hơioh ưh gơ̆h năm jê̆ anih teh hơđang, ưh gơ̆h iŏk kơmăy năm chưk hơmet ƀât anih teh hlŭn. Ƀok Nguyễn Văn Tuyến, Kơdră vei lăng kon pơlei xăh Đức Cơ ăn tơbăt, xăh hlôi đei hla ar athei Anih vei lăng choh jang xa păng cham char Gia Lai hơlen năng, chih hơdăh yoa kiơ, ƀơm truh dang yơ păng tơdrong krê hơmơt lơ liơ vă pơtho ăn kon pơlei lê̆ găn truh jang xa păng rơih trong hơmet mă ‘lơ̆ng.

"Tơƀôt ƀât doh ki, apŭng đĭ krao Anih vei lăng tơmam drăm dêh char jur hơlen năng bơih. ‘Mi hơnơ̆ng, lơ anih đei teh hơđang, lơ̆m 2 khei hơnơ̆ng đei ‘mi kơna tôch hơmơt. Tơdrong mă blŭng ‘nŏh chă tơroi, khan ăn kon pơlei: mưh năm jang mir jê̆ kiơ̆ noh athei kơchăng, hơmơt huŏng lơ̆m anih teh hơđang, tôch hơmơt. Truh âu kơnh, xăh vă hơlen năng trong jang, hơtâp kơƀang athei veh hơtăih dôm anih krê hơmơt."

Teh hơlih, hlŭn tơdrŭt tơ̆ găh pơmât kơ dêh char Gia Lai oei ƀôh tôch hơmơt lơ̆m dôm sơnăm tơjê̆ âu, mă loi tơ̆ dôm xăh Ia Krêl,  Ia Ly păng xăh Gào, ƀơm kơnê̆ truh  tơ̆ mir roh, chŭn na păng trong nơnăm. Ƀok Ngô Vĩnh Khánh, kơdră dang ei kơ Anih vei lăng dơnâu đak dêh char Gia Lai ăn tơbăt, hăm dôm anih teh hơlih pơjoă truh anih kon pơlei oei xa, dôm tơring athei chĕng hơlen anih, khan hơdrol, chă trong hơmet mă ‘lơ̆ng mă ưh ‘nŏh jăh pôk rĭ hnam kon pơlei lĕch tơ̆ nai hloi. Hăm teh mir hiong răm, Anih vei lăng choh jang xa păng cham char athei jô̆ hơlen mă tôm vă đei trong tơgŭm mă lăp.

"Dang ei hăm dôm anih teh hơlih, Anih jang đei hla ar gơih ăn dôm tơring chih tơroi rim tơdrong hiong răm, lăng kiơ̆ đơ̆ng noh vă đei trong tơgŭm, hơmet ming tơdrong jang xa. Đơ̆ng rŏng băt hơdăh tơdrong hiong răm đơ̆ng dôm tơring gơih ăn, Anih vei lăng choh jang xa vă chih akŏm gơih ăn Anih vei lăng jên hu dêh char, lăng kiơ̆ ‘nŏh vă tơlĕch trong tơgŭm ăn dôm tơring pơyoa ăn tơdrong choh jang xa."

Kŭm hăm tơgŭm ƀât măt dang ei, tơdrong hơlen năng mă nhen dôm anih hơmơt teh hơlih, hlŭn tơdrŭt tơ̆ dêh char Gia Lai gô tơgŭm ăn tơring dar deh chă đei trong jang lăp ‘lơ̆ng vă vei lăng anih oei păng tơdrong choh jang xa ăn kon pơlei. ‘Nŏh kŭm jing tơdrong vă kon pơlei gơ̆h sơđơ̆ng jơhngâm choh jang xa.