Kiơ̆ nơ̆r tơroi tơ̆ hop akŏm, lơ̆m ‘măng ‘mi kial, đak lơ̆p âu ki, kơsô̆ hnam păk, tơglơ̆h athei man ‘nao ‘nŏh 1.597 tŏ hnam, truh dang ei hlôi man đang 671 tŏ hnam, kơsô̆ oei đei ‘nŏh man tam đang. Kơsô̆ hnam hư, tơglơ̆h đei vă jê̆ 34.800 tŏ, dang ei hlôi pơm hơmet đang bơih. Kơdră chĕp kơ̆l dêh char Đăk Lắk ăn tơbăt, tơ̆ hơnăp kơnh vă hơlen năng, man hnam tang găn đak lơ̆p ăn tơpôl. Dêh char Gia Lai oei akŏm jơhngâm pơjing 38 tơring oei xa ‘nao ăn kon pơlei, vă pôk rĭ đĭ đăng hnam kon pơlei đơ̆ng tơring đak lơ̆p tŏk oei tơ̆ tơring oei xa ‘nao sơđơ̆ng ‘lơ̆ng.

Anih tơm vei lăng khul linh teh đak krao akom, pơtruh 176.000 ‘nu kăn ƀô̆, linh, dân quân hăm rơbâu tŏ gre, kơmăy kơmŏk kŭm hăm khul kơdră tơring vang tơgŭm ăn kon pơlei man, pơm hơmet ming hnam. Anih tơm vei lăng Công an krao akŏm hlŏh 11.000 ‘nu kăn ƀô̆, linh jur tơgŭm ăn kon pơlei hơmet pơ ‘lơ̆ng hiong răm đơ̆ng tŏ ‘mi kial kơnê̆. Tơ̆ hop akŏm, Thủ tướng Phạm Minh Chính tơƀôh đon hơiă mưh "Tơdrong jang Quang Trung" đơ̆ng rŏng 1 khei tơlĕch hlôi jang đang đĭ đăng hnam athei hơmet ming, trŏ hăm đon pơhnŏng vă jang. Thủ tướng athei kăt tơjur ƀiơ̆ jơnăr, adrin truh 'năr 15/01/2026 jang đang tơdrong man hơmet ming hnam păk vă kon pơlei đei hnam oei adrol kơ Hop akŏm bơngai tang măt lơ̆m teh đak 'măng mă XIV kơ Đảng.