Tơ̆ hop akŏm, Jơnŭm jang tơlĕch chă hơlen tôm tơdrong jang hơmet ăn Hop akŏm pơlong jang 'mêm kơ teh đak lơ̆m jơ̆p teh đak 'măng mă 11 đei pơgơ̆r ah năr 26-27/12; atŭm hăm noh hơlen lăng păng sek pôk hơnăn "Grŭp pơm jang nuih mơng kơ kon pơlei", "Bơngai jang nuih mơng" ăn dôm jơnŭm jang, bơngai jang. Hop akŏm Pơlong jang 'mêm kơ teh đak jing tơdrong chinh trĭ kăp gĭt kơ teh đak, hơlen lăng dơ̆ng jăl trong jang pơlong 5 sơnăm kơ ou – minh jăl jang kăp gĭt hloh, lơ tơdrong tam mă lah đei. Hop akŏm oei jing hơnih akŏm, pơlan să tơdrong 'mêm kơ teh đak, tơdrong hơpơi hơtŏk tơ-iung, plang tơdrong rơgei po đơ̆ng tôm kon pơlei, pơih minh jăl jang pơlong 'nao, 'nhăk teh đak hơtŏk pran kơtang, jơnap gơh hơgei.

Pơma pơtôch hop akŏm, Thủ tướng Phạm Minh Chính pôk bơnê kơ dôm jơnŭm jang hlôi hơdrin akŏm jang tơnăp dôm tơdrong hơmet ăn Hop akŏm pơlong jang 'mêm kơ teh đak. Thủ tướng akhan kăl jang kơtă hloi tơdrong akŏm pơdah tơbang tơdrong jang đei jơnei gah mŭk drăm – tơpôl kơ teh đak đơ̆ng rŏng 40 sơnăm tơplih 'nao; pơdah um rŭp hăm hơnăn "Pơlong jang 'mêm kơ teh đak – yuơ minh Việt Nam pơdrŏng kơtang". Atŭm hăm noh, pơgơ̆r chă tơroi gah Hop akŏm tơ-iung đon bơnôh 'mêm kơ teh đak, pơ-ư pơ-ang kơ kon pơlei, pơlan să tơdrong jang pơlong lơ̆m tơpôl, pơjing jơhngơ̆m pran, akŏm jang ăn hơtŏk tơ-iung teh đak lơ̆m dôm sơnăm đơ̆ng rŏng.