Kơsơ̆ năr 24/9, tơ̆ Hơnih bơ̆ jang Khul kơdră chĕp pơgơ̆r teh đak, Thủ tướng Teh đak Phạm Minh Chính pơm tơm hop akŏm ‘măng mă 4 Hơnih chĕp pơgơ̆r kơ Khul kơdră teh đak găh atŏk tơ iung khoa hŏk kmăi kmŏk, tơplih ‘nao tơchăr păng Tơdrong vă jang 06. Jang kiơ̆ Tơdrong tơchơ̆t 57 kơ Hơnih tơm Chinh trĭ, truh dang ei Khoa hŏk kmăi kmŏk, tơplih ‘nao tơchăr păng tơplih kơsô̆ hlôi atok tơ iung kơtang. Khei 8 sơnăm ou, Việt Nam iŏk đei Khul 10 apŭng plĕnh teh găh atŏk kơtang Internet; 1/4 măt bơngai kon pơlei gơh iŏk yoa 5G; et hơtŏk Hơnih tơm chih răk dôm tơdrong teh đak kơsô̆ 1; iŏk yoa tơlei kap kuang tơ̆ groi teh kơjung hơtăih vă jê̆ 4.000km tơƀưh hăm 5 teh đak. Hơnih jang kmăi kmŏk pơm tơlĕch tơmam drăm kmăi kmŏk kơsô̆ hơnơ̆ng sơkơ̆t hơdăh hơnăp jang tơm mưh khei 8 ou ki jang sa iok đei hloh 3,3 triu ti hlak jên ... Tơ̆ hop akom, Thủ tướng Phạm Minh Chính pơma hơdăh, rim tơdrong tơchơ̆t đơ̆ng Hơnih tơm Chinh trĭ ‘nao pơjing đei ƀơm truh khoa hŏk kmăi kmŏk, tơplih ‘nao tơchăr, tơplih kơsô̆; kơyuơ lơ loh kăl tơgĕch rim năr, rim jơ vă hơnhăk khoa hŏk kmăi kmŏk, tơplih ‘nao tơchăr păng tơplih kơsô̆ iung jang ‘lơ̆ng hơ iă. Thủ tướng athei tĕnh koăng tơ iung pơjing keh đang hơnih chih răk rim hơnih bơ̆ jang, tơring tơrang lơ̆m sơnăm ou. Thủ tướng pơma hơdăh trong tơlĕch ăn tơlĕch jang kơtang, jơnei tôm tong; kăl iŏk kon pơlei, hơnih mơdro sa pơm hơnih tơm, tơdrong jang, jơhngơ̆m pran, mŭk drăm kơ tơdrong atŏk tơ iung. Găh jang kiơ̆ khul kơdră chĕp pơgơ̆r tơring 2 kâp, Thủ tướng athei akŏm iung jang keh đang tơplih kơsô̆, mă kăl tơ̆ tơring.