Kơsơ̆ năr 14/01, Thủ tướng Phạm Minh Chính pơm tơm ‘Măng hop akŏm mă tơdrou kơ Hơnih chĕp pơgơ̆r teh đak tơlĕch jang kiơ̆ nơ̆r pơkăp đơ̆ng Việt Nam tơ̆ Hop akom COP26. Pơma pơtôch hop akŏm, Thủ tướng sơkơ̆t hơdăh tơdrong Việt Nam tơlĕch rim nơ̆r pơkăp kơtang tơ̆ COP26, lơ̆m ou đei trong tơlĕch ăn jang keh đang ƀlep pơkăp tơlĕch yuh ‘mê̆ hơtŏ hăm “0” lơ̆m sơnăm 2050, ‘noh jĭ tơdrong tơchơ̆t tôch trŏ ƀlep, tơbăt hơdăh hơnăp jang kơtang hăm tơpôl apŭng plĕnh teh păng kơ yuơ tơdrong atok tơ iung kơjăp ‘lơ̆ng kơ teh đak. Thủ tướng teh đak hôn bơnê kơtang trong tơlĕch jang kiơ̆ ‘lơ̆ng păng đĭ ai đơ̆ng rim hơnih tơm, hơnih bơ̆ jang, tơring, tơpôl hơnih mơdro sa păng kon pơlei lơ̆m tơlĕch jang kiơ̆ tơdrong jang hlôi tơlĕch ăn. Kiơ̆ đơ̆ng Thủ tướng, jang kiơ̆ trong tơlĕch ăn tơlĕch yuh ‘mê̆ ‘mach hơtŏ hăm “0” ‘noh tơdrong long tih tên mă lei jei pơih trong rơvơn vă hơmet ming tơdrong jang mŭk drăm kiơ̆ rơgoh ‘lơ̆ng, kơjăp ‘lơ̆ng, pơm hơtŏk tơdrong pơm tơm kơdih păng kĕ pơjei. Tang găn tơplih tŏ ‘mi kial jĭ tơdrong kăl iung jang kiơ̆, lơ̆m ou kon pơlei păng hơnih mơdro sa mĭnh păh jĭ khul tơm, mĭnh păh jĭ bơngai tơ-‘ngla, vang iung jang hloi păng jang kiơ̆ tôm tong hơnăp jang đơ̆ng kơdih.