Sơng pơma dơnuh hăm Kơdră tang măt Canada, Thủ tướng sơkơt hơdăh, Việt Nam lăng Canada jĭ teh đak jang hơdoi gĭt kăl păng ‘meh vă atŏk tơ iung tơgoăt tơgoăl tôm tong roi năr roi kơjăp, lăng truh hrôih ba tơdrong tơgoăt tơgoăl tŏk kơtang hloh dơ̆ng. Thủ tướng athei Canada hơnơ̆ng pơih trong ăn tơmam drăm Việt Nam, mă kăl ‘noh rim tơmam drăm choh jang sa ‘long ka hơdang; atŏk kơtang jang hơdoi pơjing khul jang lơ̆m rim hơnih jang kmăi kmŏk hơgei. Ƀar păh hơnơ̆ng iung jang hơdoi kơjăp, jơnei, tơgum djru dih băl tơ̆ rim khul, hop akŏm lơ̆m tơring păng apŭng plĕnh teh, mă kăl lơ̆m tơdrong Tơchơ̆t Jang hơdoi tôm tong păng Gơh hơgei (CPTPP) mă Việt Nam pơm Kơdră chĕp pơgơ̆r lơ̆m sơnăm 2026 păng Hop akom Jang hơdoi Mŭk drăm Châu Á - Thái Bình Dương (APEC) mă Việt Nam pơm Kơdră chĕp pơgơ̆r lơ̆m sơnăm 2027.

Sơng pơma dơnuh hăm Kơdră tang măt Hàn Quốc, Thủ tướng sơkơ̆t hơdăh, Khul kơdră chĕp pơgơ̆r Việt Nam gô pơjing rim tơdrong rơvơn ăn rim hơnih mơdro sa teh đak đe, lơ̆m ou đei hơnih mơdro sa Hàn Quốc sơđơ̆ng jơhngơ̆m tơmơ̆t jên jang sơđơ̆ng, đunh đai tơ̆ Việt Nam. Ƀok athei ƀar păh atŏk kơtang jang hơdoi oei sa joh ayŏ păng tơgŭm djru Việt Nam atŏk tơ iung hơnih jang oei sa joh ayŏ, pơih să tơƀơ̆p năm ngôi dih băl kơ kon pơlei ‘moi kiơ̆ atŏk kơtang sơng tơmơ̆t bơngai jang Việt Nam năm jang tơ̆ Hàn Quốc.

Sơng pơma dơnuh hăm Kơdră tang măt Australia, Thủ tướng Lê Minh Hưng pơma tơbăt jơhngơ̆m đon chơt hơ iă mưh pơ đĭ 6 tơdrong jang tơm lơ̆m Tơdrong iung jang tơlĕch jang kiơ̆ Tơgoăt tơgoăl jang hơdoi gĭt kăl Tôm tong Việt Nam - Australia jăl jang 2024-2027 jei đei tơlĕch jag ƀlep jơ ‘năr pơkă, truh dang ei hlôi iung jang keh đang 96%. Pơma hơdăh ƀar teh đak oei đei lơ tơdrong hơ iă jang hơdoi, Thủ tướng athei bar păh tơlĕch jang kiơ̆ rim trong jang kơtang vă jang kiơ̆ ‘lơ̆ng trong tơlĕch jang mơdro sa dih băl iŏk đei truh 20 ti USD păng tŏk hloh ƀar ‘măng tơmơ̆t jên jang dih băl lơ̆m khei năr kơnh.