Kơsơ̆ 25/12, tơ̆ Anih jang kơ Khul kơdră teh đak, Thủ tướng Phạm Minh Chính truh Hop akŏm lơ̆m teh đak pơtôch 20 sơnăm bơ̆ jang kiơ̆ tơdrong Tơchơ̆t 36 đơ̆ng Anih tơm Chinh trĭ păng dôm hla ar pơtho đei ƀơm truh tơdrong jang kơ bơngai Việt Nam oei xa tơ̆ teh đak đe. Hop akŏm pơma hơdăh, tơpôl bơngai Việt Nam oei tơ̆ teh đak đe jĭ 1 păh ưh đei tơpleh hăm hơdrĕch hơdrung, jĭ khul jang gĭt kăl vang tơgop ‘lơ̆ng ăn tơdrong jang tŏk kơ teh đak.

Đơ̆ng rŏng 20 sơnăm tơlĕch tơdrong tơchơ̆t, tơpôl hơnơ̆ng tŏk pran găh kơsô̆ bơngai jang păng bơ̆ jang ‘lơ̆ng, gơ̆h hơgei, đơ̆ng dang 2,7 triu ‘nu bơngai sơnăm 2004 tŏk vă jê̆ 6,5 triu ‘nu bơngai tơ̆ hlŏh 130 teh đak, lơ̆m noh đei dang 80% arih xa tơ dôm teh đak pơdrŏng, đei anih dơ̆ng roi đunh roi kơjăp. Pơma nơ̆r pơtho tơ̆ hop akŏm, Thủ tướng Phạm Minh Chính athei hơnơ̆ng hơmet pơ ‘lơ̆ng trong jang, pơjing tơdrong ‘lơ̆ng vă kon pơlei oei xa tơ̆ teh đak đe vang jang roi tih lơ̆m tơdrong arih xa mŭk drăm, tơpôl, tưk tơiung đon rơgei, tơguăt băl păng pơjing kơsô̆ chih răk găh tơpôl bơngai Việt Nam tơ̆ teh đak đe.