Thủ tướng pơgơ̆r rim hơnih jang tơm, rim tơring hơdrin hloh, pơm jang kơtang hloh vă đei jơnei kiơ̆ tơchơ̆t hơtŏk 2 kơsô̆ kiơ̆ Tơchơ̆t Hop akŏm mă 14 kơ Đảng. Tang măt ăn lơ tơring pơkăp khŏm mă jang đơ̆ng khei blŭng, jăl mă blŭng kơ sơnăm 2026, pơm trong tơplih hơdah gah asong jên jang kŏng, hơmet 'lơ̆ng hla bar hanh chinh, hơtŏk 'lơ̆ng tơdrong jang tĕch răt.

Thủ tướng ră hơdah, sơnăm 2026 jĭ sơnăm blŭng kơ jăl jang, kăp gĭt pơm trong jang, pơjing đon lui păng jơhngơ̆m pran jang kiơ̆ Tơchơ̆t Hop akŏm mă 14 hăm lơ tơchơ̆t jang 'nao, pran kơtang. Thủ tướng pơgơ̆r athei akŏm jang kiơ̆ Tơdrong jang hăm dôm tơchơ̆t mŭk drăm – tơpôl dơnơm, jang hơdah 12 grŭp tơdrong jang jing 264 sơnong jang, tơdrong jang dơnơm; atŭm hăm noh tơrĕk truh joh ayŏ - tơpôl, tơdrong pơyua, vei sơđơ̆ng jên khei jang, hơpah Têt ăn bơngai jang, vei sơđơ̆ng sơlam teh, vei sơđơ̆ng lơ̆m tơpôl.