Tơ̆ ‘măng hop akŏm, dôm bơngai jang lơ̆m khŭl kơdră teh đak hlôi pơma dơnuh akŏm lơ̆m dôm tơdrong gĭt kăl, oei tơgop nơ̆r pha ra băl kăl apĭnh nơ̆r tơgop đơ̆ng Khŭl kơdră teh đak găh: Luơ̆t Ŭnh hơyuh nguyên tử (hơmet ming); Luơ̆t asong tơlĕch đak; Luơ̆t vei lăng, hơtŏk tơiung anih kơdrơ̆m; Luơ̆t Khoa hŏk kơmăy kơmŏk păng tơplih ‘nao; Luơ̆t Iŏk yua ŭnh hơyuh ‘mơ ‘met, đei yua; păng athei pơjing Luơ̆t Anih mơdro sa (hơmet ming).

Pơma tơ̆ hop akŏm, Thủ tướng Phạm Minh Chính tơƀôh rơđăh: tơmơ̆t jên jang mă keh đang, pơjing khôi luơ̆t ‘noh tơmơ̆t jên jang ăn hơtŏk tơiung; jang ‘lơ̆ng tơdrong jang pơjing khôi luơ̆t gô pơm tơdrong hiôk ăn hơtŏk tơiung. Thủ tướng athei tơdrong pơjing dôm hla ar khôi luơ̆t athei akŏm đon hơgei, hơtŏk jơhngơ̆m đon jang tơnăp, dôm hla ar chih athei mă kơđeh, rơđăh nơ̆r, ƀônh kơ hlôh, ƀônh kơ tơmơ̆t yua, ƀônh kơ jang, ƀônh kơ hơlen lăng, dăr lăng, athei tơlĕch jang hrĕnh, jang răh, lăng iŏk tơdrong hlôh vao, jang pơkeh răh.